വാരിസ് അവസാന ഘട്ടത്തിലേക്ക്; ദളപതിയുടെ പുത്തൻ ചിത്രങ്ങൾ വൈറൽ

ദളപതി വിജയ് നായകനായി എത്തുന്ന ഏറ്റവും പുതിയ ചിത്രമാണ് വാരിസ്. ഈ ചിത്രത്തിന്റെ ഏതാനും പോസ്റ്ററുകള്‍ ദളപതി വിജയ്‌യുടെ പിറന്നാള്‍ ദിനത്തോട് അനുബന്ധിച്ച് അണിയറ പ്രവര്‍ത്തകര്‍ റിലീസ് ചെയ്തിരുന്നു. ഇപ്പോഴിതാ ഈ ചിത്രത്തിന്റെ പുതിയ ഷെഡ്യൂളിൽ ജോയിൻ ചെയ്യാൻ പോകുന്ന വിജയ്‌യുടെ ചിത്രങ്ങളാണ് സോഷ്യൽ മീഡിയയിൽ വൈറലായി മാറുന്നത്. ഹൈദരാബാദിൽ നിന്ന് വിശാഖപട്ടണത്തേക്കാണ് ഇപ്പോൾ ഈ ചിത്രം ഷിഫ്റ്റ് ആയിരിക്കുന്നത്. അതുകൊണ്ട് വിശാഖപട്ടണത്തേക്കു പോകാൻ ചെന്നൈ വിമാനത്താവളത്തിലെത്തിയ ദളപതിയുടെ ചിത്രങ്ങളാണ് സോഷ്യൽ മീഡിയയിൽ പ്രചരിക്കുന്നത്. കഴിഞ്ഞയാഴ്ചയാണ് ഈ ചിത്രത്തിന്റെ ഹൈദരാബാദ് ഷെഡ്യൂൾ അവസാനിച്ചത്. ഈ ചിത്രത്തില്‍ ഒരു ആപ്പ് ഡെവലപ്പര്‍ ആയിട്ടാവും വിജയ് അഭിനയിക്കുന്നതെന്നും, ഇതിലെ വിജയ് കഥാപാത്രത്തിന്റെ പേര് വിജയ് രാജേന്ദ്രന്‍ എന്നായിരിക്കുമെന്നും തമിഴ് മാധ്യമങ്ങൾ അടുത്തിടെ റിപ്പോർട്ട് ചെയ്തിരുന്നു.

https://youtube.com/shorts/WCYMuDN7URk

ശ്രീ വെങ്കിടേശ്വര ക്രിയേഷന്‍സിന്റെ ബാനറില്‍ ദേശീയ അവാര്‍ഡ് ജേതാവായ നിര്‍മാതാവ് ദില്‍ രാജുവും ശിരീഷും ചേർന്നാണ് ഈ ചിത്രം നിർമ്മിക്കുന്നത്, സൂപ്പർ ഹിറ്റ് ചിത്രങ്ങൾ സമ്മാനിച്ച വംശി സംവിധാനം ചെയ്യുന്ന ഈ ചിത്രത്തിൽ വിജയ് ഇരട്ട വേഷമാണ് ചെയ്യുന്നതെന്നും വാർത്തകൾ വന്നിരുന്നു. രശ്‌മിക മന്ദാന നായികാ വേഷം ചെയ്യുന്ന ഈ ചിത്രത്തിൽ പ്രകാശ് രാജ്, പ്രഭു, ശാം, യോഗി ബാബു, ജയസുധ എന്നിവരും അഭിനയിക്കുന്നു. ഈ ചിത്രത്തിന് സംഗീതമൊരുക്കുന്നത് എസ് തമൻ, ക്യാമറ ചലിപ്പിക്കുന്നത് കാർത്തിക് പളനി, എഡിറ്റ് ചെയ്യാൻ പോകുന്നത് കെ എൽ പ്രവീൺ എന്നിവരാണ്. അടുത്ത വർഷം ജനുവരിയിൽ പൊങ്കൽ റിലീസായാണ് വാരിസ് പ്രദർശനത്തിനെത്തുക. തെലുങ്ക് സൂപ്പര്‍താരം മഹേഷ് ബാബു ഇതിൽ അതിഥി വേഷം ചെയ്യുമെന്ന് നേരത്തെ റിപ്പോർട്ടുകൾ വന്നിരുന്നു.