സർക്കാർ വർക്കിംഗ് സ്റ്റില്ലുകൾ എത്തി തുടങ്ങി; ആവേശത്തോടെ സ്വീകരിച്ചു വിജയ് ആരാധകർ..!

ഇളയ ദളപതി വിജയ് നായകനായി എത്തുന്ന സർക്കാർ റിലീസ് ചെയ്യാൻ പോകുന്നത് ഈ വർഷം നവംബർ ആറിന് ദീപാവലി റിലീസ് ആയാണ്. ചിത്രത്തിന്റെ ഓഡിയോ ലോഞ്ച് ഈ വർഷം ഒക്ടോബർ രണ്ടിന് നടത്തുമെന്നും അണിയറ പ്രവർത്തകർ അറിയിച്ചിരുന്നു. എന്നാൽ അതിനു ഒരു മാസം മുന്നേ തന്നെ സർക്കാർ ഫീവർ സോഷ്യൽ മീഡിയയിൽ ആരംഭിച്ചു കഴിഞ്ഞു എന്ന് പറയാം. ഈ ചിത്രത്തിന്റെ വർക്കിംഗ് സ്റ്റില്ലുകൾ ഇന്ന് മുതൽ പുറത്തു വന്നു തുടങ്ങി. വിജയ് ആരാധകർ ഏറെ ആവേശത്തോടെയാണ് ഇത് സ്വീകരിക്കുന്നത്. എ ആർ മുരുഗദോസ് സംവിധാനം ചെയ്ത ഈ ചിത്രത്തിലെ അണിയറ ജോലികൾ പ്രേക്ഷകരിലേക്ക് എത്തിക്കുന്ന ഷൂട്ടിംഗ് സ്റ്റില്ലുകളും മറ്റും ഇനി തുടർച്ചയായി പ്രേക്ഷകരുടെ മുന്നിലേക്ക് എത്തിക്കും എന്ന് സർക്കാർ ടീം പ്രഖ്യാപിച്ചിരുന്നു. തുപ്പാക്കി, കത്തി എന്നെ ബ്ലോക്ക്ബസ്റ്റർ ചിത്രങ്ങൾക്ക് ശേഷം എ ആർ മുരുഗദോസ്- വിജയ് ടീം ഒന്നിച്ച ചിത്രമാണ് സർക്കാർ.

ഈ ചിത്രത്തിന്റെ ടീസർ, ട്രൈലെർ എന്നിവ ഒരുപാട് വൈകാതെ തന്നെ പ്രേക്ഷകരിലേക്ക് എത്തും എന്നാണ് സൂചന. ഒരു മാസ്സ് പൊളിറ്റിക്കൽ ത്രില്ലർ ആയാണ് ഈ ചിത്രം ഒരുക്കിയിരിക്കുന്നതെന്നും റിപ്പോർട്ടുകൾ ഉണ്ട്. ഇതിന്റെ ഫസ്റ്റ് ലുക്ക് പോസ്റ്റർ ഒക്കെ സോഷ്യൽ മീഡിയയിൽ ഏറെ ശ്രദ്ധ നേടിയിരുന്നു. സംഗീത മാന്ത്രികൻ എ ആർ റഹ്മാൻ ഈണം നൽകിയ ഗാനങ്ങൾ ആണ് ഈ ചിത്രത്തിന്റെ മറ്റൊരു സവിശേഷത. കീർത്തി സുരേഷ്, വരലക്ഷ്മി ശരത് കുമാർ എന്നിവർ പ്രധാന സ്ത്രീ കഥാപാത്രങ്ങൾ ആയെത്തുന്ന ഈ ചിത്രത്തിൽ ഒരു വമ്പൻ താര നിര തന്നെ അണിനിരക്കുന്നുണ്ട്. വിജയ് എന്ന താരത്തിനോടൊപ്പം തന്നെ വിജയ് എന്ന നടനും പ്രാധാന്യം കൊടുക്കുന്ന തരത്തിൽ ആണ് ഈ ചിത്രത്തിന്റെ കഥ പറയുന്നത് എന്നാണ് എ ആർ മുരുഗദോസ് പറഞ്ഞിരിക്കുന്നത്. വമ്പൻ ബഡ്ജറ്റിൽ ആണ് സർക്കാർ അണിയിച്ചൊരുക്കിയിരിക്കുന്നത്.