ഇത്തിക്കര പക്കി സ്പെഷ്യൽ ഹോർഡിങ്‌സുകൾ ആവേശമാകുന്നു; കായംകുളം കൊച്ചുണ്ണിയെ കാത്തു ആരാധകരും സിനിമാ പ്രേമികളും..!

മോഹൻലാൽ- നിവിൻ പോളി ടീം ആദ്യമായി ഒന്നിച്ച കായംകുളം കൊച്ചുണ്ണി എന്ന ചിത്രത്തിന്റെ റിലീസ് ഡേറ്റ് അനൗൺസ് ചെയ്യുന്നതിനായി ആകാംഷയോടെ കാത്തിരിക്കുകയാണ് ഓരോ സിനിമാ പ്രേമികളും. ഓഗസ്റ്റ് പതിനേഴിന് ആണ് റിലീസ് പറഞ്ഞിരുന്നത് എങ്കിലും കേരളത്തിൽ ഉണ്ടായ പ്രളയത്തിന്റെ പശ്ചാത്തലത്തിൽ എല്ലാ സിനിമകളുടെയും റിലീസ് നീട്ടുകയായിരുന്നു. കേരളം ആ ദുരന്തത്തിൽ നിന്നെല്ലാം അതിജീവിച്ചു പുറത്തു വന്നതോടെ ഇനി പുതിയ ചിത്രങ്ങൾ എത്തിത്തുടങ്ങുമെന്നാണ് സൂചന. സെപ്റ്റംബർ ആദ്യ വാരം മുതൽ പുതിയ ചിത്രങ്ങൾ എത്തിത്തുടങ്ങും. അതിൽ തന്നെ പ്രേക്ഷകർ ഏറ്റവുമധികം കാത്തിരിക്കുന്ന ചിത്രങ്ങളിൽ ഒന്നാണ് കായംകുളം കൊച്ചുണ്ണി. കായംകുളം കൊച്ചുണ്ണി എന്ന ടൈറ്റിൽ കഥാപാത്രമായി നിവിൻ പോളി എത്തുമ്പോൾ ഇത്തിക്കര പക്കി ആയി അതിഥി വേഷത്തിൽ ആണ് മോഹൻലാൽ എത്തുന്നത്.

എന്നാൽ ഇപ്പോൾ കേരളത്തിൽ തരംഗമായി മാറുന്നത് ഇത്തിക്കര പക്കി സ്പെഷ്യൽ ഹോർഡിങ്ങുകൾ ആണ്. കേരളമെങ്ങും ഇപ്പോൾ ഇത്തിക്കര പക്കിയുടെ കൂറ്റൻ കട്ടൗട്ടുകളും ഹോർഡിങ്ങുകളും പൊങ്ങി കഴിഞ്ഞു. ഒരു അതിഥി വേഷമായിട്ടു കൂടി ഇത്തിക്കര പക്കിയെ കാണാൻ ആണ് പ്രേക്ഷകർ ഏറെ ആവേശത്തോടെ കാത്തിരിക്കുന്നത്. റോഷൻ ആൻഡ്രൂസ് സംവിധാനം ചെയ്ത ഈ ബിഗ് ബജറ്റ് ചിത്രം രചിച്ചത് ബോബി- സഞ്ജയ് ടീമും , ഈ ചിത്രം നിർമ്മിച്ചിരിക്കുന്നത് ഗോകുലം മൂവീസിന്റെ ബാനറിൽ ഗോകുലം ഗോപാലനും ആണ്. മോഹൻലാൽ, നിവിൻ പോളി എന്നിവർക്ക് പുറമെ സണ്ണി വെയ്ൻ, പ്രിയ ആനന്ദ്, ബാബു ആന്റണി, ഷൈൻ ടോം ചാക്കോ, മണികണ്ഠൻ ആചാരി, സുദേവ് നായർ, പ്രിയങ്ക തിമേഷ് തുടങ്ങി ഒരു വലിയ താര നിര തന്നെ ഈ ചിത്രത്തിൽ അണിനിരക്കുന്നുണ്ട്.