ബോക്സ് ഓഫിസിൽ കൊടുങ്കാറ്റാവാൻ ബീസ്റ്റ് മോഡിൽ ദളപതി; സോഷ്യൽ മീഡിയയിൽ പ്രകമ്പനം സൃഷ്ടിച്ചു ഫസ്റ്റ് ലുക്ക്..!

ദളപതി വിജയ് നായകനായി എത്തുന്ന പുതിയ ചിത്രത്തിന്റെ ടൈറ്റിലും ഫസ്റ്റ് ലുക്ക് പോസ്റ്ററും ഇന്ന് പുറത്തു വിട്ടു. നാളെ തന്റെ ജന്മദിനം ആഘോഷിക്കുകയാണ് ദളപതി വിജയ്. അദ്ദേഹത്തിനുള്ള ജന്മദിന സമ്മാനമായി ആണ് അണിയറ പ്രവർത്തകർ ഈ പോസ്റ്റർ പുറത്തു വിട്ടിരിക്കുന്നത്. നെൽസൺ ദിലീപ്കുമാർ സംവിധാനം ചെയ്യുന്ന ഈ ചിത്രം നിർമ്മിക്കുന്നത് സൺ പിക്ചേഴ്സ് ആണ്. പക്കാ മാസ്സ് ആക്ഷൻ എന്റെർറ്റൈനെർ ആയി ഒരുങ്ങുന്ന ഈ ചിത്രത്തിൽ പൂജ ഹെഗ്‌ഡെ, യോഗി ബാബു, ഷൈൻ ടോം ചാക്കോ, വിടിവി ഗണേഷ്, അപർണ്ണ ദാസ്, പുകഴ് എന്നിവരും അഭിനയിക്കുന്നു. ഈ ചിത്രം രചിച്ചിരിക്കുന്നതും സംവിധായകൻ തന്നെയാണ്. ഒരു തോക്കുമായി സ്റ്റൈലിഷ് ലുക്കിൽ നിൽക്കുന്ന ദളപതി വിജയ്‌യിനെ ആണ് ഇന്ന് പുറത്തു വിട്ട ഫസ്റ്റ് ലുക്ക്  പോസ്റ്ററിൽ നമ്മുക്ക് കാണാൻ സാധിക്കുന്നത്. ബീസ്റ്റ് എന്നാണ് ചിത്രത്തിന് നൽകിയിരിക്കുന്ന പേര്. ഏതായാലും ഫസ്റ്റ് ലുക്ക് പോസ്റ്റർ പുറത്തു വന്നു നിമിഷങ്ങൾക്കകം തന്നെ സോഷ്യൽ മീഡിയയിൽ വമ്പൻ പ്രകമ്പനമാണ് വിജയ് ആരാധകർ സൃഷ്ടിച്ചിരിക്കുന്നത്.

സൂപ്പർ ഹിറ്റായ കോലമാവ്‌ കോകില എന്ന നയൻ‌താര ചിത്രം ഒരുക്കി അരങ്ങേറ്റം കുറിച്ച നെൽസൺ സംവിധാനം ചെയ്യുന്ന മൂന്നാമത്തെ ചിത്രമാണ് ബീസ്റ്റ്. നെൽസൺ രണ്ടാമതായി ഒരുക്കിയ ശിവകാർത്തികേയൻ ചിത്രം ഡോക്ടർ റിലീസ് കാത്തിരിക്കുകയാണ്. അനിരുദ്ധ് രവിചന്ദർ സംഗീതം ഒരുക്കുന്ന ബീസ്റ്റിനു വേണ്ടി കാമറ ചലിപ്പിക്കുന്നത് മനോജ് പരമഹംസയും എഡിറ്റിംഗ് നിർവഹിക്കുന്നത് ആർ നിർമ്മലും ആണ്. തെന്നിന്ത്യൻ താര സുന്ദരി പൂജ ഹെഗ്‌ഡെ ആദ്യമായി വിജയ്‌ക്കൊപ്പം അഭിനയിക്കുന്ന ചിത്രമെന്ന പ്രത്യേകതയും ബീസ്റ്റിനു ഉണ്ട്.