ആഗോള ശ്രദ്ധ നേടിയ ദൃശ്യം 2 ജൂലൈ മുതൽ തീയേറ്ററുകളിലും

ഈ വർഷത്തെ മലയാള സിനിമയിലെ ഏറ്റവും വലിയ വിജയമാണ് മോഹൻലാൽ നായകനായ ദൃശ്യം 2 എന്ന ജീത്തു ജോസഫ് ചിത്രം നേടിയത്. ജീത്തു ജോസഫ് രചിച്ചു സംവിധാനം ചെയ്ത ഈ ചിത്രം ആമസോൺ പ്രൈം റിലീസ് ആയി എത്തി ലോകം മുഴുവൻ സൂപ്പർ ഹിറ്റായി മാറി. ഇത്രയധികം ദേശീയ- അന്തർദേശീയ ശ്രദ്ധയും പ്രശംസയും ലഭിച്ച ഒരു മലയാള ചിത്രം ഇതിനു മുൻപ് ഉണ്ടായിട്ടില്ല എന്ന് വേണം പറയാൻ. ഐ എം ഡി ബി റേറ്റിങ്ങിൽ ഈ വർഷം റിലീസ് ചെയ്തതിൽ ഏറ്റവും കൂടുതൽ റേറ്റിങ് നേടിയ ഇന്ത്യൻ ചിത്രമായി മാറിയതിനൊപ്പം തന്നെ ഏറ്റവും വലിയ ജനപ്രീതി നേടിയ ഇന്ത്യൻ ചിത്രങ്ങളുടെ ലിസ്റ്റിൽ നാലാം സ്ഥാനവും ദൃശ്യം 2 കരസ്ഥമാക്കി. ടെലിവിഷൻ പ്രീമിയറിൽ ഈ വർഷത്തെ ഏറ്റവും വലിയ റേറ്റിങ് നേടിയ മലയാള ചിത്രമായും മാറിയ ദൃശ്യം 2 ആമസോൺ പ്രൈം കരസ്ഥമാക്കിയത് മുപ്പതു കോടിയെന്ന റെക്കോർഡ് തുകയ്ക്കാണ്. ഇപ്പോഴിതാ ഈ ചിത്രം തീയേറ്റർ റിലീസിന് കൂടി ഒരുങ്ങുകയാണ്. 

ഈ മാസം അവസാനം സിംഗപ്പൂരിൽ റിലീസ് ചെയ്യുന്ന ദൃശ്യം 2 , വരുന്ന ജൂലൈ ഒന്ന് മുതൽ ഗൾഫിലും റിലീസ് ചെയ്യും. സിംഗപ്പൂരിലെ ഗോൾഡൻ വില്ലേജ് മൾട്ടിപ്ലക്സുകളിൽ ജൂൺ 26 ശനിയാഴ്ച മുതൽ ആണ് ദൃശ്യം 2 പ്രദർശനം ആരംഭിക്കുക. ഗൾഫിൽ വലിയ റിലീസ് ആയി തന്നെ ദൃശ്യം 2 എത്തുമെന്ന് ചിത്രത്തിന്റെ വിതരണം എടുത്ത ഫാർസ് ഫിലിംസ് ഒഫീഷ്യൽ ആയി തന്നെ അറിയിച്ചിട്ടുണ്ട്. കേരളത്തിലെ തീയേറ്ററുകൾ അടുത്ത മാസം തുറക്കുകയാണ് എങ്കിൽ ദൃശ്യം 2 ഇവിടെയും റിലീസ് ചെയ്യുമോ എന്നറിയാനുള്ള കാത്തിരിപ്പിലാണ് ഇപ്പോൾ ആരാധകരും സിനിമാ പ്രേമികളും. പത്തു കോടി രൂപയ്ക്കു ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിച്ച ഈ ചിത്രം അമ്പതു കോടിയിൽ അധികം ബിസിനസ് ആണ് നടത്തിയത്. മാത്രമല്ല, ഈ ചിത്രം തെലുങ്കു, ഹിന്ദി, കന്നഡ, ചൈനീസ്, കൊറിയൻ ഭാഷകളിലേക്ക് റീമേക്ക് ചെയ്യുകയുമാണ്.