ത്രില്ലടിപ്പിക്കാൻ ടോവിനോ തോമസ്- കീർത്തി സുരേഷ് ടീമിന്റെ വാശി ഇന്ന് മുതൽ; തീയേറ്റർ ലിസ്റ്റ് ഇതാ

ഡിയർ ഫ്രണ്ട് എന്ന വിനീത് കുമാർ ചിത്രത്തിന് ശേഷം റിലീസ് ചെയ്യുന്ന ടോവിനോ തോമസ് ചിത്രമായ വാശി ഇന്ന് മുതൽ പ്രദർശനമാരംഭിക്കുകയാണ്. കീർത്തി സുരേഷ് നായികാ വേഷം ചെയ്യുന്ന ഈ ചിത്രത്തിൽ ടോവിനോയും കീർത്തിയും വക്കീൽ കഥാപാത്രങ്ങളായാണ് എത്തുന്നത്. ഇതിന്റെ ടീസർ, ട്രൈലെർ എന്നിവയെല്ലാം വലിയ പ്രേക്ഷക ശ്രദ്ധയാണ് നേടിയെടുത്തത്. കേരളത്തിൽ മികച്ച റിലീസ് ലഭിച്ചിരിക്കുന്ന ഈ ചിത്രത്തിന്റെ തീയേറ്റർ ലിസ്റ്റ് ഇവിടെ ചേർക്കുന്നു. അഡ്വ. എബിന്‍ ആന്‍ഡ് അഡ്വ. മാധവി എന്നാണ് ടോവിനോ തോമസ്, കീർത്തി സുരേഷ് എന്നിവർ യഥാക്രമം അവതരിപ്പിക്കുന്ന കഥാപാത്രങ്ങളുടെ പേര്. ഒരേ കേസില്‍ വാദിക്കും പ്രതിക്കും വേണ്ടി വാദിക്കേണ്ടിവരുന്ന രണ്ട് അഭിഭാഷകരുടെ വേഷത്തിലാണ് ടോവിനോയും കീര്‍ത്തിയുമെത്തുന്നതെന്നാണ് ഇതിന്റെ ടീസർ, ട്രൈലെർ എന്നിവ സൂചിപ്പിക്കുന്നത്.

നവാഗതനായ വിഷ്ണു ജി. രാഘവ് സംവിധാനം ചെയ്തിരിക്കുന്ന ഈ ചിത്രം രേവതി കലാമന്ദിറിന്റെ ബാനറിൽ ജി സുരേഷ് കുമാർ മേനക സുരേഷ് കുമാർ എന്നിവർ ചേർന്നാണ് നിർമ്മിച്ചിരിക്കുന്നത്. ഉര്‍വശി തിയേറ്റേഴ്സും രമ്യ മൂവീസുമാണ് വാശി കേരളത്തിൽ വിതരണം ചെയ്തിരിക്കുന്നത്. വിഷ്ണു ജി രാഘവ് തന്നെ രചന നിർവഹിച്ച ഈ ചിത്രത്തിന്റെ കഥ ജാനിസ് ചാക്കോ സൈമണിന്റേതാണ്. ടോവിനോ തോമസ്, കീർത്തി സുരേഷ് എന്നിവർ കൂടാതെ, കോട്ടയം രമേശ്, മായാ വിശ്വനാഥ്, റോണി ഡേവിഡ്, ബൈജു, നന്ദു, മായാ മേനോൻ എന്നിവരും ഈ ചിത്രത്തിന്റെ താരനിരയിലുണ്ട്. മഹേഷ് നാരായണന്‍ എഡിറ്റിംഗ് നിർവഹിച്ച ഈ ചിത്രത്തിന് സംഗീതം ഒരുക്കിയത് കൈലാസ് മേനോൻ, ക്യാമറ ചലിപ്പിച്ചത് റോബി വർഗീസ് രാജ് എന്നിവരാണ്.