ഷെയിൻ നിഗമിന്റെ ‘ഉല്ലാസം’ ജൂലൈ 1 മുതൽ തീയേറ്ററുകളിലേക്ക്

ഷെയിൻ നിഗമിനെ നായകനാക്കി നവാഗതനായ ജീവൻ ജോജോ സംവിധാനം ചെയ്‌ത പുതിയ ചിത്രമാണ് ഉല്ലാസം. ഇപ്പോൾ ഈ ചിത്രത്തിന്റെ റിലീസ് തിയതി പുറത്ത് വിട്ടിരിക്കുകയാണ് ഇതിന്റെ അണിയറപ്രവർത്തകർ. പ്രണയവും ആക്ഷനും കോമെഡിയുമെല്ലാം ഒത്തുചേർന്ന ഈ ചിത്രം ജൂലൈ 1 ന് തീയേറ്ററുകളിൽ എത്തും. ഇതുവരെ കണ്ടതിൽ നിന്നും വ്യത്യസ്ത രൂപത്തിലും ഭാവത്തിലുമാണ് ഷെയിൻ നിഗം ചിത്രത്തില്‍ പ്രത്യക്ഷപ്പെടുന്നത്. പവിത്ര ലക്ഷ്മിയാണ് ചിത്രത്തിൽ നായികയായി എത്തുന്നത്. ചിത്രത്തിന്റേതായി പുറത്തിറങ്ങിയ ഫസ്റ്റ് ലുക്ക് പോസ്റ്റർ, ടീസർ, ട്രൈലെർ എന്നിവ വലിയ പ്രേക്ഷക ശ്രദ്ധ നേടിയിരുന്നു. കഴിഞ്ഞ ദിവസം പുറത്തിറങ്ങിയ പെണ്ണെ പെണ്ണെ എന്ന വരികളോടെ തുടങ്ങുന്ന ഗാനം സോഷ്യൽ മീഡിയയിൽ തരംഗമായി മാറിയിരുന്നു. ബി കെ ഹരിനാരായണന്‍റെ വരികൾക്ക് ഷാൻ റഹ്മാനാണ് ഗാനങ്ങൾ ഒരുക്കിയിരിക്കുന്നത്.

ഷെയിൻ നിഗമിനെ കൂടാതെ അജു വർഗീസ്, ദീപക് പറമ്പോൽ, ബേസിൽ ജോസഫ്, ലിയോണ ലിഷോയ്, അപ്പുക്കുട്ടി, ജോജി, അംബിക, നയന എൽസ തുടങ്ങിയവരാണ് ചിത്രത്തിലെ മറ്റ് അഭിനേതാക്കള്‍. കെെതമറ്റം ബ്രദേഴ്സിന്റെ ബാനറിൽ ജോ കൈതമറ്റം, ക്രിസ്റ്റി കൈതമറ്റം എന്നിവർ ചേർന്നാണ് ചിത്രത്തിന്റെ നിർമ്മാണം. പ്രവീൺ ബാലകൃഷ്ണൻ തിരക്കഥ രചിച്ച ഈ ചിത്രത്തിന് ക്യാമറ ചലിപ്പിച്ചത് അരവിന്ദന്റെ അതിഥികൾ എന്ന ചിത്രത്തിലൂടെ ശ്രദ്ധേയനായ സ്വരൂപ് ഫിലിപ്പും, എഡിറ്റ് ചെയ്തത് ജോൺ കുട്ടിയുമാണ്.