പുതിയ വർഷത്തിലെ ആദ്യ ബ്ലോക്ക്ബസ്റ്റർ; 50 കോടി ക്ലബ്ബിലേക്ക് കുതിച്ച് മാളികപ്പുറം

യുവ താരം ഉണ്ണി മുകുന്ദനെ നായകനാക്കി നവാഗതനായ വിഷ്ണു ശശി ശങ്കർ ഒരുക്കിയ ചിത്രമാണ് മാളികപ്പുറം. മികച്ച പ്രേക്ഷക പ്രതികരണം നേടിയ ഈ ചിത്രം നാലാം വാരത്തിലേക്കു കടക്കുമ്പോഴും ഗംഭീര പ്രേക്ഷക പിന്തുണ നേടി കേരളത്തിലെ തീയേറ്ററുകളിൽ നിറഞ്ഞോടുകയാണ്. ഈ വർഷത്തെ ആദ്യത്തെ ബ്ലോക്ക്ബസ്റ്റർ എന്ന പദവിയാണ് ഈ ചിത്രം നേടിയിരിക്കുന്നത്. കേരളത്തിൽ നിന്ന് മാത്രം 25 കോടിക്ക് മുകളിൽ കളക്ഷൻ നേടിയ ഈ ചിത്രം ആഗോള കളക്ഷനായി 50 കോടിയിലേക്കാണ് കുതിക്കുന്നത്. ഉണ്ണി മുകുന്ദന്റെ കരിയറിലെ തന്നെ ഏറ്റവും വലിയ വിജയമായി ഈ ചിത്രം മാറിക്കഴിഞ്ഞു. അഭിലാഷ് പിള്ളൈ രചിച്ച ഈ ചിത്രം നിർമ്മിച്ചിരിക്കുന്നത് കാവ്യാ ഫിലിമ്സിന്റെ ബാനറിൽ വേണു കുന്നപ്പിള്ളി, ആൻ മെഗാ മീഡിയയുടെ ബാനറിൽ ആന്റോ ജോസഫ് എന്നിവർ ചേർന്നാണ്.

വമ്പൻ ജനത്തിരക്ക് മൂലം 145 തീയേറ്ററുകളില്‍ നിന്ന് 230ല്‍ അധികം തീയേറ്ററുകളിലേക്ക് പ്രദര്‍ശനം വ്യാപിപ്പിച്ചിരിക്കുകയാണ് ഈ ചിത്രം. ഇതിന്റെ തമിഴ്, തെലുങ്ക് പതിപ്പുകളും റിലീസ് ചെയ്യാൻ പോവുകയാണ്. അതിന്റെ ട്രൈലെറുകളും റിലീസ് ചെയ്ത്കഴിഞ്ഞു. ജനുവരി 26 നാണ് ഈ പതിപ്പുകൾ റിലീസ് ചെയ്യുക. ദേവനന്ദ, ശ്രീപദ് എന്നീ ബാലതാരങ്ങളും പ്രധാന വേഷങ്ങൾ ചെയ്ത ഈ ചിത്രത്തിൽ സൈജു കുറുപ്പ്, രമേശ് പിഷാരടി, ശ്രീജിത് രവി, ടി ജി രവി, രഞ്ജി പണിക്കർ, മനോജ് കെ ജയൻ, സമ്പത്ത് റാം, അജയ് വാസുദേവ് എന്നിവരും അഭിനയിച്ചിട്ടുണ്ട്. വിഷ്ണു നാരായണൻ ക്യാമറ ചലിപ്പിച്ച ഈ ചിത്രത്തിന് സംഗീതം ഒരുക്കിയത് രഞ്ജിൻ രാജ് ആണ്. ഷമീർ മുഹമ്മദാണ് ഈ ചിത്രം എഡിറ്റ് ചെയ്തിരിക്കുന്നത്.