മേജർ രവി- ഉണ്ണി മുകുന്ദൻ ടീം ഒന്നിക്കുന്ന ബിഗ് ബഡ്ജറ്റ് ചിത്രം വരുന്നു; ഇന്ത്യ-ചൈന പ്രശ്നം മുഖ്യവിഷയം..!

മലയാളത്തിലെ കിടിലൻ പട്ടാള ചിത്രങ്ങൾ നമ്മുക്ക് സമ്മാനിച്ച പ്രശസ്ത സംവിധായകനും നടനും റിട്ടയേർഡ് ആർമി ഓഫീസറുമാണ് മേജർ രവി. പുനർജനി എന്ന ചിത്രം ഒരുക്കി അരങ്ങേറ്റം കുറിച്ച അദ്ദേഹം കീർത്തിചക്ര, കുരുക്ഷേത്ര, പിക്കറ്റ് 43 എന്നീ മൂന്നു സൂപ്പർ ഹിറ്റ് ആർമി ചിത്രങ്ങൾ നമ്മുക്ക് സമ്മാനിച്ചിട്ടുണ്ട്. ഇത് കൂടാതെ മിഷൻ 90 ഡേയ്സ്, കർമയോധ, കാണ്ഡഹാർ, 1971- ബിയോൻഡ് ബോര്ഡര്സ് എന്നീ ചിത്രങ്ങളും അദ്ദേഹം നമ്മുടെ മുന്നിലെത്തിച്ചിട്ടുണ്ട്. ഇപ്പോഴിതാ, ഒരു വമ്പൻ ചിത്രവുമായി അദ്ദേഹം നമ്മുടെ മുന്നിൽ ഒരിക്കൽ കൂടി എത്തുകയാണ് എന്ന സൂചനയാണ് ലഭിക്കുന്നത്. മലയാളത്തിന്റെ യുവ താരം ഉണ്ണി മുകുന്ദൻ ആണ് ഈ ചിത്രത്തിലെ നായക വേഷം ചെയ്യുക. ഉണ്ണി മുകുന്ദൻ ആദ്യമായാണ് മേജർ രവി ഒരുക്കുന്ന ചിത്രത്തിൽ നായക വേഷം ചെയ്യാൻ പോകുന്നത് എന്ന പ്രത്യേകതയും ഇതിനുണ്ട്.

ഇന്ത്യ- ചൈന ഗാൽവിൻ വാലി പ്രശ്നത്തെ അധികരിച്ചാണ് ഈ ചിത്രം ഒരുങ്ങാൻ പോകുന്നത് എന്നും ഇപ്പോൾ ലഭിക്കുന്ന വിവരങ്ങൾ പറയുന്നു. ഈ ചിത്രത്തിന്റെ ഔദ്യോഗിക പ്രഖ്യാപനം വൈകാതെ ഉണ്ടാകുമെന്നാണ് സൂചന. വളരെ അടുത്ത സൗഹൃദം പുലർത്തുന്ന മേജർ രവി-ഉണ്ണി മുകുന്ദൻ കൂട്ടുകെട്ട് സിനിമയിൽ ഒരുമിച്ചഭിനയിച്ചിട്ടുണ്ട്. ഉണ്ണി മുകുന്ദൻ നിർമ്മിച്ച സൂപ്പർ ഹിറ്റ് ചിത്രം മേപ്പടിയാനിൽ വക്കീൽ വേഷത്തിലെത്തി, കയ്യടി നേടുന്ന പ്രകടനമാണ് മേജർ രവി കാഴ്ചവെച്ചത്. ഉണ്ണി മുകുന്ദൻ നായകനായി ഒരുപിടി വലിയ ചിത്രങ്ങൾ ഇപ്പോൾ മലയാളത്തിൽ ഒരുങ്ങുന്നുണ്ട്. വൈശാഖ്- ഉണ്ണി മുകുന്ദൻ ടീം ഒന്നിക്കുന്ന ബ്രൂസ് ലീ എന്ന ചിത്രം അത്തരത്തിലുള്ള ഒരു വമ്പൻ ചിത്രമാണ്.