മാമാങ്കത്തിൽ ഏവരുടെയും പ്രശംസ പിടിച്ചു പറ്റിയ ബാലതാരം അച്യുതനെ വീട്ടിൽ പോയി കണ്ടു ഉമ്മൻ ചാണ്ടി; മുൻ മുഖ്യമന്ത്രിയുടെ വാക്കുകൾ ശ്രദ്ധ നേടുന്നു

മെഗാ സ്റ്റാർ മമ്മൂട്ടിയെ നായകനാക്കി എം പദ്മകുമാർ സംവിധാനം ചെയ്ത മാമാങ്കം ഇപ്പോൾ തീയേറ്ററുകളിൽ പ്രദർശനം തുടരുകയാണ്. മമ്മൂട്ടിയോടൊപ്പം ഉണ്ണി മുകുന്ദൻ, മാസ്റ്റെർ അച്യുതൻ എന്നിവർ തിളങ്ങിയ ചിത്രം നിർമ്മിച്ചത് കാവ്യാ ഫിലിമ്സിന്റെ ബാനറിൽ ശ്രീ വേണു കുന്നപ്പിള്ളി ആണ്. ഈ ചിത്രത്തിൽ ഏറെ കയ്യടി നേടിയ കഥാപാത്രം ആണ് മാസ്റ്റർ അച്യുതൻ അവതരിപ്പിച്ച ചന്ദ്രോത് ചന്തുണ്ണി. കളരിമുറകളും ആയി ഈ ബാലൻ ഉജ്ജ്വല പ്രകടനമാണ് ഈ ചിത്രത്തിൽ കാഴ്ച വെച്ചത്. താൻ ഈ ചിത്രത്തിൽ വെറും സഹതാരമാണ് എന്നും അച്യുതൻ ആണ് ഈ ചിത്രത്തിലെ നായകൻ എന്നും മെഗാ സ്റ്റാർ മമ്മൂട്ടി തന്നെ പറഞ്ഞിരുന്നു. എന്തായാലും കാണികളുടെ കയ്യടി നേടിയെടുത്ത അച്യുതനെ കാണാൻ മുൻ കേരളാ മുഖ്യമന്ത്രിയും പുതുപ്പള്ളി എം എൽ എ യും ആയ ഉമ്മൻ ചാണ്ടി തന്നെ നേരിട്ടെത്തി.

ചിത്രം കണ്ടതിനു ശേഷം അച്യുതനെ അഭിനന്ദിക്കാൻ ആണ് ഉമ്മൻ ചാണ്ടി എത്തിയത്. തിരക്കുകൾ മൂലം ആണ് അച്യുതനെ കാണാൻ എത്താൻ വൈകിയത് എന്നും അതിമനോഹരമായ പ്രകടനമാണ് അച്യുതൻ ഈ ചിത്രത്തിൽ കാഴ്ച വെച്ചത് എന്നും ഉമ്മൻ ചാണ്ടി പറഞ്ഞു. എല്ലാ വിജയങ്ങളും ആശംസകളും അച്യുതന് നേരുന്നു എന്നും ഉമ്മൻ ചാണ്ടി പറഞ്ഞു. ഉമ്മൻ ചാണ്ടി അച്യുതനെ കാണാൻ വന്നപ്പോൾ ഉള്ള ലൈവ് വീഡിയോ മാമാങ്കം ഒഫീഷ്യൽ ഫേസ്ബുക് പേജ് വഴി ഷെയർ ചെയ്തിട്ടുണ്ട്. ഒട്ടേറെ പേര് അച്യുതനെ കുറിച്ച് നല്ലതു പറയുന്നത് കേട്ടത് കൊണ്ട് കൂടിയാണ് താൻ അച്യുതനെ സന്ദർശിച്ചു നേരിട്ട് അഭിനന്ദനം അറിയിച്ചത് എന്നും ഉമ്മൻ ചാണ്ടി പറഞ്ഞു. അനു സിതാര, പ്രാചി ടെഹ്‌ലാൻ എന്നിവരും അഭിനയിച്ച ഈ ചിത്രം നാല് ഭാഷകളിൽ ആയാണ് റിലീസ് ചെയ്തത്.