ഈ ചിത്രം എന്റെ ഹൃദയത്തോട് ചേര്‍ന്നു നില്‍ക്കുന്നു: നിവിൻ പോളിയുടെ ജൂഡ് പ്രേക്ഷകരുടെ കണ്ണ് നിറയ്ക്കുമെന്ന് തൃഷ

നിവിൻ പോളിയെ നായകനാക്കി ശ്യാമപ്രസാദ് സംവിധാനം ചെയ്യുന്ന ചിത്രമാണ് ‘ഹേയ് ജൂഡ്’.
തെന്നിന്ത്യൻ ചലച്ചിത്രനടി തൃഷ ആദ്യമായി മലയാളത്തിലേയ്ക്ക് ചുവടുവെയ്ക്കുന്ന ചിത്രം കൂടിയാണിത്. ‘ഹേയ് ജൂഡ്’ റിലീസിന് തയ്യാറെടുക്കുമ്പോൾ ചിത്രത്തിൽ നിവിന്‍ പോളിയുടെ പ്രകടനം കണ്ണു നിറയ്ക്കുന്നതാണെന്ന് വ്യക്തമാക്കിയിരിക്കുകയാണ് തൃഷ. ചിത്രത്തിന്റെ ട്രെയിലറിൽ തൃഷ മലയാളം പറയുന്നത് കണ്ടെന്നും നിവിന്‍റെ പെര്‍ഫോമന്‍സ് പ്രേക്ഷകരുടെ കണ്ണുകളെ ഈറനയിക്കുമെന്ന് സംശയിക്കുന്നു എന്നും തമിഴിലെ പ്രശസ്ത അവതാരകയായ ദിവ്യ ദര്‍ശിനി ട്വീറ്റ് ചെയ്‌തിരുന്നു. ഇതിന് മറുപടിയായാണ് ‘നിവിന്‍റെ ജൂഡ് നിങ്ങളെ കുറച്ചു കരയിക്കാന്‍ സാധ്യതയുണ്ടെ’ന്ന് തൃഷ പറഞ്ഞത്.

ക്രിസ്റ്റല്‍ എന്ന കഥാപാത്രത്തെയാണ് തൃഷ ചിത്രത്തില്‍ അവതരിപ്പിക്കുന്നത്. ഈ ചിത്രം തന്‍റെ ഹൃദയത്തോട് ചേര്‍ന്നു നില്‍ക്കുന്നതാണെന്നും, സിനിമയുടെ ഭാഗമാകാന്‍ കഴിഞ്ഞതില്‍ അഭിമാനമുണ്ടെന്നും തൃഷ വ്യക്തമാക്കിയിരുന്നു. ഇതുവരെ കാണാത്ത ലുക്കിൽ ശരീരഭാരം വര്‍ധിപ്പിച്ച് തടിച്ചുരുണ്ട രൂപത്തിലാണ് നിവിൻ പോളി ‘ഹേയ് ജൂഡി’ൽ എത്തുന്നത്.

ഇവിടെ, ഇംഗ്ലീഷ് തുടങ്ങിയ ചിത്രങ്ങളില്‍ ശ്യാമപ്രസാദിനൊപ്പം പ്രവര്‍ത്തിച്ച നിവിന്‍ പോളി നീണ്ട ഇടവേളയ്ക്ക് ശേഷമാണ് വീണ്ടും അദ്ദേഹത്തിനൊപ്പം ചേരുന്നത്. സിദ്ധിക്ക്, അജു വർഗീസ്, നീന കുറുപ്പ്, വിജയ് മേനോൻ എന്നിവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. ഗോവയിലും പരിസരങ്ങളിലുമായാണ് ചിത്രത്തിന്റെ ഷൂട്ടിംഗ് പൂർത്തിയാക്കിയിരിക്കുന്നത്. ഔസേപ്പച്ചൻ ആണ് സംഗീതം നൽകിയിരിക്കുന്നത്. ഇ4 എന്റർടൈൻമെന്റിന്റെ ബാനറിൽ അനിൽ അമ്പലക്കരയാണ് ചിത്രത്തിന്റെ നിർമ്മാണം.