ബോക്സ് ഓഫീസ്‌ ഭരിക്കാൻ ARM ; ടോവിനോ ചിത്രത്തിന്റെ ഓൾ കേരളാ ബുക്കിംഗ് ആരംഭിച്ചു

ടോവിനോ തോമസിന്റെ കരിയറിലെ ഏറ്റവും വലിയ ചിത്രമായി എത്തുന്ന അജയന്റെ രണ്ടാം മോഷണം സെപ്റ്റംബർ 12 – നു പ്രേക്ഷകരുടെ മുന്നിലെത്തുന്നു. പാൻ ഇന്ത്യൻ റിലീസായി മലയാളം, തമിഴ്, തെലുങ്ക്, ഹിന്ദി, കന്നഡ ഭാഷകളിൽ റിലീസ് ചെയ്യുന്ന ഈ ചിത്രത്തിന്റെ കേരളത്തിലെ അഡ്വാൻസ് ടിക്കറ്റ് ബുക്കിംഗ് ആരംഭിച്ചു. ഓൾ കേരളാ തലത്തിൽ ഇപ്പോൾ ഈ ചിത്രത്തിന്റെ ടിക്കറ്റുകൾ പ്രേക്ഷകർക്ക് ബുക്ക് ചെയ്യാം. ആവേശകരമായ പ്രതികരണമാണ് ചിത്രത്തിന്റെ അഡ്വാൻസ് ബുക്കിംഗ് ആരംഭിച്ചപ്പോൾ മുതൽ പ്രേക്ഷകരിൽ നിന്നും ലഭിക്കുന്നത്.

വിദേശത്തും വലിയ റിലീസായെത്തുന്ന ഈ ചിത്രത്തിന്റെ ഓവർസീസ് ബുക്കിങ്ങും നേരത്തെ തന്നെ ആരംഭിച്ചിരുന്നു. സെൻസറിങ് പൂർത്തിയായപ്പോൾ യു/എ സർട്ടിഫിക്കറ്റ് ലഭിച്ച ഈ ചിത്രത്തിന്റെ ദൈർഘ്യം 2 മണിക്കൂർ 28 മിനിട്ടാണ്. മാജിക് ഫ്രെയിംസ്, യു.ജി.എം മോഷൻ പിക്ചേഴ്സ് എന്നീ ബാനറുകളിൽ ലിസ്റ്റിൻ സ്റ്റീഫൻ, ഡോ. സക്കറിയ തോമസ് എന്നിവർ ചേർന്ന് നിർമ്മിച്ച അജയന്റെ രണ്ടാം മോഷണം മൂന്ന് കാലഘട്ടങ്ങളുടെ പശ്‌ചാത്തലത്തിലാണ്‌ കഥ പറയുന്നത്. നവാഗതനായ ജിതിൻ ലാലാണ് ഈ ചിത്രം സംവിധാനം ചെയ്തിരിക്കുന്നത്.

ടു ഡി, ത്രീഡി ഫോര്മാറ്റുകളിലായാണ് ചിത്രം പ്രേക്ഷകരുടെ മുന്നിലെത്തുക. സുജിത് നമ്പ്യാർ തിരക്കഥ രചിച്ച ഈ ചിത്രത്തിൽ മൂന്നു വേഷങ്ങളാണ് ടോവിനോ തോമസ് അവതരിപ്പിക്കുന്നത്. ടോവിനോക്കൊപ്പം കൃതി ഷെട്ടി, ഐശ്വര്യ രാജേഷ്, സുരഭി ലക്ഷ്മി, ബേസിൽ ജോസഫ്, ജഗദീഷ്, ഹരീഷ് ഉത്തമൻ, ഹരീഷ് പേരടി, പ്രമോദ് ഷെട്ടി, രോഹിണി എന്നിവരും വേഷമിട്ട ഈ ചിത്രം ഇമോഷൻ, ആക്ഷൻ, അഡ്വെഞ്ചർ, ഫാന്റസി, മാജിക്കൽ റിയലിസം, പ്രണയം എല്ലാം ഉൾപ്പെടുന്ന ഒരു കമ്പ്ലീറ്റ് ഫെസ്റ്റിവൽ എന്റെർറ്റൈനെർ ആയിരിക്കുമെന്നാണ് അണിയറ പ്രവർത്തകർ പറയുന്നത്.