അന്ന് ടോവിനോക്കു വിമർശനം; ഇന്ന് ആദ്യ ചിത്രത്തിൽ ടോവിനോ നായകൻ..!

ഈ കഴിഞ്ഞ ഏപ്രിൽ മാസത്തിൽ ടോവിനോ തോമസ് വോട്ട് ചെയ്യാൻ എത്തിയതിനെ കുറിച്ച് മുൻ എറണാകുളം എം പി ആയിരുന്ന സെബാസ്റ്റിയൻ പോൾ നടത്തിയ ഒരു വിമർശനവും ടോവിനോ തോമസ് അതിനു നൽകിയ മറുപടിയും ശ്രദ്ധേയമായിരുന്നു. മോഹൻലാലും ടോവിനോ തോമസും ചെയ്തത് കന്നി വോട്ട് ആണെന്നായിരുന്നു സെബാസ്റ്റിയൻ പോൾ പറഞ്ഞത്. എന്നാൽ ഇങ്ങനെ മണ്ടത്തരം പറഞ്ഞു തെറ്റിദ്ധാരണ പരത്തരുത് എന്നായിരുന്നു ടോവിനോ തോമസ് മറുപടി നൽകിയത്. താൻ വോട്ട് ചെയ്തതിനെ കുറിച്ച് വളരെ വിശദമായി ഒരു കുറിപ്പ് തന്നെ ടോവിനോ തോമസ് അന്ന് പോസ്റ്റ് ചെയ്തിരുന്നു. ഇപ്പോഴിതാ സെബാസ്റ്റിയൻ പോൾ ആദ്യമായി തിരക്കഥ ഒരുക്കുന്ന ചിത്രത്തിൽ നായകനായി എത്തുന്നതും ടോവിനോ തോമസ് തന്നെയാണ് എന്നതാണ് രസകരമായ വസ്തുത.

കേരളം കണ്ട ഏറ്റവും ധീരനായ പത്ര പ്രവർത്തകരിൽ ഒരാളായ സ്വദേശാഭിമാനി രാമകൃഷ്ണ പിള്ളയുടെ ജീവ ചരിത്രം ആണ് സിനിമ ആവുന്നത്. സെബാസ്റ്റിയൻ പോൾ തിരക്കഥ രചിച്ച ഈ ചിത്രത്തിലെ കേന്ദ്ര കഥാപാത്രം ആയി എത്തുന്നത് ടോവിനോ ആണ്. വൈക്കം മുഹമ്മദ് ബഷീറിന്റെ ബാല്യകാല സഖി സിനിമ ആക്കിയ പ്രമോദ് പയ്യന്നൂർ ആണ് ഈ ചിത്രവും സംവിധാനം ചെയ്യുക. 1878 മുതൽ 1916 വരെയുള്ള കാലഘട്ടത്തിൽ നിന്ന് കഥ പറയുന്ന ഈ ചിത്രം ഒരു ബിഗ് ബജറ്റ് ചിത്രം ആയിരിക്കും എന്നാണ് സൂചന. ടോവിനോ തോമസിന്റെ ഇപ്പോഴുള്ള തിരക്കുകൾ തീരുന്നതിനു ശേഷം ആയിരിക്കും ഈ ചിത്രത്തിന്റെ ജോലികൾ തുടങ്ങുക എന്നും സെബാസ്റ്റിയൻ പോൾ പറയുന്നു.