വൈക്കം മുഹമ്മദ് ബഷീറിന്റെ നിഴലുകൾ വീണ്ടും; മലയാളത്തിലെ ആദ്യ ഹൊറർ ചിത്രം പുനർജനിക്കുന്നു; നീലവെളിച്ചം ഫസ്റ്റ് ലുക്ക് കാണാം

പ്രശസ്ത സംവിധായകൻ ആഷിഖ് അബുവൊരുക്കുന്ന ഏറ്റവും പുതിയ ചിത്രമായ നീല വെളിച്ചത്തിന്റെ ഷൂട്ടിംഗ് ഇപ്പോൾ നടക്കുകയാണ്. തലശേരി, പിണറായിയിൽ ആണ് ഇതിന്റെ ഷൂട്ടിംഗ് ഈ കഴിഞ്ഞ ഏപ്രിൽ മാസത്തിലാരംഭിച്ചത്. ടോവിനോ തോമസ്, റിമ കല്ലിങ്കൽ, റോഷൻ മാത്യു, ഷൈൻ ടോം ചാക്കോ, രാജഷ് മാധവൻ, ഉമ കെ.പി, പൂജാ മോഹൻരാജ്, ദേവകി ഭാഗി എന്നിവരഭിനയിക്കുന്ന ഈ ചിത്രത്തിന്റെ ഫസ്റ്റ് ലുക്ക് പോസ്റ്റർ ഇപ്പോൾ റിലീസ് ചെയ്തിരിക്കുകയാണ്. ടോവിനോ തോമസ് അവതരിപ്പിക്കുന്ന നോവലിസ്റ്റായ കേന്ദ്ര കഥാപാത്രത്തിന്റെ നിഴൽ പോലെയുള്ളൊരു രൂപമാണ് ഫസ്റ്റ് ലുക്ക് പോസ്റ്ററിൽ നമ്മുക്ക് കാണാൻ സാധിക്കുക. അതോടൊപ്പം തന്നെ ഈ വർഷം ഡിസംബറിലാണ് നീലവെളിച്ചം റിലീസ് ചെയ്യുകയെന്നും ഫസ്റ്റ് ലുക്ക് പോസ്റ്റർ നമ്മളോട് പറയുന്നു. വൈക്കം മുഹമ്മദ് ബഷീറിന്റെ ഭാർഗ്ഗവീനിലയം എന്ന വിഖ്യാത തിരക്കഥയെ അടിസ്ഥാനമാക്കിയാണ് ഈ ചിത്രമൊരുക്കുന്നത്.

വൈക്കം മുഹമ്മദ് ബഷീർ കഥയും തിരക്കഥയും നിർവഹിച്ച ഭാർഗവീനിലയം എന്ന, മലയാളത്തിലെ ആദ്യത്തെ ഹൊറർ ചിത്രത്തിന്റെ പുനരാവിഷ്കാരമാണ് നീല വെളിച്ചം. 1964 ഇൽ പുറത്ത് വന്ന ഭാർഗവി നിലയം സംവിധാനം ചെയ്തത് എ വിൻസെന്റ് ആണ്. മധു, പ്രേം നസീർ, വിജയ നിർമല എന്നിവർ അഭിനയിച്ച ഈ ചിത്രം മലയാള സിനിമയിലെ ക്ലാസ്സിക്കുകളിൽ ഒന്നായാണ് വിലയിരുത്തപ്പെടുന്നത്. ഒപിഎം ഡ്രീം മിൽ എന്ന ബാനറിനു കീഴിൽ ആഷിഖ് അബുവും സന്തോഷ് ടി കുരുവിളയും ചേർന്ന് നിർമിക്കുന്ന നീലവെളിച്ചത്തിനു ക്യാമറ ചലിപ്പിക്കുന്നത് ഗിരീഷ് ഗംഗാധരൻ, എഡിറ്റ് ചെയ്യുന്നത് സൈജു ശ്രീധരൻ, സംഗീതമൊരുക്കുന്നത് ബിജിബാൽ, റെക്സ് വിജയൻ എന്നിവരുമാണ്.