ടൊവിനോ ചിത്രം ‘മായാനദി’ ക്രിസ്തുമസിന് എത്തും

ടൊവീനോ തോമസിനെ നായകനാക്കി ആഷിക് അബു സംവിധാനം ചെയ്യുന്ന പുതിയ ചത്രം ‘മായാനദി’ ക്രിസ്തുമസിന് തിയേറ്ററുകളിലേക്ക് . ചിത്രത്തിന്റെ ഫസ്റ്റ്ലുക് പോസ്റ്റർ കഴിഞ്ഞ ദിവസം പുറത്തിറങ്ങിയിരുന്നു. ടൊവിനോയുടെ നായികയായി എത്തുന്നത് ഞണ്ടുകളുടെ നാട്ടിൽ ഒരിടവേള എന്ന ചിത്രത്തിലൂടെ പ്രേക്ഷക പ്രശംസ പിടിച്ചുപറ്റിയ ഐശ്വര്യ ലക്ഷ്മിയാണ്.

അമൽ നീരദിന്‍റെ കഥക്ക് ശ്യാം പുഷ്‌കരനും ദിലീഷ് നായരും ചേര്‍ന്നാണ് തിരക്കഥ ഒരുക്കിയിരിക്കുന്നത്. ജയേഷ് മോഹനാണു ചിത്രത്തിന്റെ ഛായാഗ്രാഹകൻ. റെക്സ് വിജയന്‍ സംഗീത സംവിധാനവും സൈജു ശ്രീധരന്‍ എഡിറ്റിംഗും നിർവഹിക്കുന്നു. സമീറാ സനീഷാണ് വസ്ത്രാലങ്കാരം. ഒപിഎം പ്രൊഡക്ഷൻസിന്റെ ബാനറിൽ ആഷിക് അബു സന്തോഷ് ടി കുരുവിള എന്നിവർ ചേർന്നാണ് ചിത്രം നിർമിച്ചിരിക്കുന്നത്. സോള്‍ട്ട് ആന്‍ഡ് പെപ്പര്‍, ഡാ തടിയാ, ഇടുക്കി ഗോള്‍ഡ് എന്നീ ഹിറ്റ് ചിത്രങ്ങൾക്ക് ശേഷം ശ്യാമും ദിലീഷും ചേർന്ന് രചന നിർവഹിക്കുന്ന ആഷിക് അബു ചിത്രം എന്ന പ്രത്യേകതയും ഈ ചിത്രത്തിനുണ്ട്.