മാസ്സ് ലുക്കിൽ ടോവിനോ തോമസ്; മാരി 2 സ്റ്റിൽസ് സോഷ്യൽ മീഡിയയിൽ ട്രെൻഡാവുന്നു..!

ധനുഷ് നായകനായി എത്തുന്ന മാരി 2 ഈ വരുന്ന ഡിസംബർ മാസത്തിൽ റിലീസ് ചെയ്യാനുള്ള തയ്യാറെടുപ്പിലാണ് അണിയറ പ്രവർത്തകർ. ഈ ചിത്രത്തിലെ ധനുഷിന്റേയും സായി പല്ലവിയുടെയും ടോവിനോ തോമസിന്റെയും ഫസ്റ്റ് ലുക്ക് പോസ്റ്ററുകൾ റിലീസ് ചെയ്യുകയും അതെല്ലാം വമ്പൻ പ്രേക്ഷക ശ്രദ്ധ നേടിയെടുക്കുകയും ചെയ്തു. അതോടൊപ്പം ഈ ചിത്രത്തിലെ താരങ്ങളുടെ സ്റ്റില്ലുകളും റിലീസ് ചെയ്തു കഴിഞ്ഞു. ടോവിനോ തോമസ് വതരിപ്പിക്കുന്ന വില്ലൻ കഥാപാത്രത്തിന്റെ സ്റ്റില്ലുകൾ ഇപ്പോൾ സോഷ്യൽ മീഡിയയിൽ ട്രെൻഡ് ആയി മാറുകയാണ്. ഭീജ അഥവാ താനാറ്റോസ് എന്ന വില്ലൻ കഥാപാത്രത്തെയാണ് ടോവിനോ ഈ ചിത്രത്തിൽ അവതരിപ്പിക്കുന്നത്. മാസ്സ് ലുക്കിൽ ആണ് ടോവിനോ തോമസ് പ്രത്യക്ഷപ്പെട്ടിരിക്കുന്നത് എന്നതാണ് ആരാധകരെ ആവേശം കൊള്ളിക്കുന്നതു.

ധനുഷ് ടൈറ്റിൽ വേഷത്തിൽ എത്തുമ്പോൾ ഇതിലെ നായികാ വേഷത്തിൽ എത്തിയിരിക്കുന്നത് സായി പല്ലവി ആണ്. അരാത് ആനന്ദി എന്നാണ് സായി പല്ലവി അവതരിപ്പിക്കുന്ന കഥാപാത്രത്തിന്റെ പേര്. ഒരു ഓട്ടോ ഡ്രൈവർ ആയാണ് സായി പല്ലവി ഈ ചിത്രത്തിൽ അഭിനയിച്ചിരിക്കുന്നത്. വരലക്ഷ്മി ശരത് കുമാർ, കൃഷ്ണ കുലശേഖരൻ, വിദ്യ പ്രദീപ്, റോബോ ശങ്കർ, കല്ലൂരി വിനോദ് എന്നിവരും അഭിനയിക്കുന്ന ഈ ചിത്രത്തിന് സംഗീതം ഒരുക്കിയത് യുവാൻ ശങ്കർ രാജയും ദൃശ്യങ്ങൾ ഒരുക്കിയത് ഓം പ്രകാശും ആണ്. വണ്ടർ ബാർ സിനിമയുടെ ബാനറിൽ ധനുഷ് നിർമ്മിച്ച ഈ ചിത്രം ലൈക്ക പ്രൊഡക്ഷൻസ് ആണ് വിതരണം ചെയ്യുക. ബാലാജി മോഹൻ രചനയും സംവിധാനവും നിർവഹിച്ച ഈ മാസ്സ് എന്റെർറ്റൈനെർ ഡിസംബർ ഇരുപത്തിയൊന്നിന് ആണ് റിലീസ് ചെയ്യുന്നത്. ബി ആർ വിജയ ലക്ഷ്മി സംവിധാനം ചെയ്ത അഭിയും അനുവും എന്ന ദ്വിഭാഷാ ചിത്രത്തിന് ശേഷം ടോവിനോ ചെയ്ത തമിഴ് ചിത്രമാണ് മാരി 2 .