മാരി 2 കണ്ട് തമിഴിൽ നിന്ന് ആരൊക്കെ വിളിച്ചു; സത്യാവസ്ഥ ടോവിനോ തോമസ് തുറന്നു പറയുന്നു..!

യുവ താരം ടോവിനോ തോമസിന്റെ രണ്ടു ചിത്രങ്ങൾ ആണ് ഇപ്പോൾ ഒരേ സമയം തീയേറ്ററുകളിൽ നിറഞ്ഞോടുന്നത്. മലയാള ചിത്രമായ എന്റെ ഉമ്മാന്റെ പേരും തമിഴ് ചിത്രമായ മാരി 2 ഉം ആണവ. എന്റെ ഉമ്മാന്റെ പേരിൽ ടോവിനോ നായകൻ ആയാണ് എത്തിയത് എങ്കിൽ മാരി 2 എന്ന ചിത്രത്തിൽ വില്ലൻ വേഷത്തിലാണ് ഈ യുവ താരം ആരാധകരെ ത്രസിപ്പിക്കുന്നത് . ധനുഷ് നായകനായ ഈ ചിത്രം ടോവിനോ തോമസിന്റെ രണ്ടാമത്തെ തമിഴ് ചിത്രമാണ്. ബി ആർ വിജയ ലക്ഷ്മി ഒരുക്കിയ അഭിയും അനുവും എന്ന ദ്വിഭാഷാ ചിത്രത്തിലൂടെയാണ് ടോവിനോ തമിഴിൽ അരങ്ങേറിയത്. ഇപ്പോഴിതാ മാരി 2 കണ്ടിട്ട് തമിഴിൽ നിന്ന് പ്രമുഖർ ആരെങ്കിലും വിളിച്ചു അഭിനന്ദിച്ചോ എന്ന ചോദ്യത്തിന് വളരെ രസകരമായ മറുപടി ആണ് ടോവിനോയിൽ നിന്ന് ലഭിച്ചത്.

കമല ഹാസൻ വിളിച്ചു, രജനികാന്ത് വിളിച്ചു എന്നൊക്കെ പറയണം എന്ന് ആഗ്രഹം ഉണ്ടെങ്കിലും അവർ ആരും ഇതുവരെ വിളിച്ചിട്ടില്ല എന്ന് ടോവിനോ സരസമായി പറയുന്നു. എന്നാൽ സുഹൃത്തുക്കളും ഏറ്റവുമടുത്ത  ബന്ധുക്കളും തുടങ്ങി തന്നോട് വളരെ അടുപ്പമുള്ള കുറെയധികം ആളുകൾ വിളിക്കുകയും അഭിന്ദനം അറിയിക്കുകയും ചെയ്തു എന്ന് ടോവിനോ പറഞ്ഞു. ഭീജ എന്ന വില്ലൻ ആയാണ് ടോവിനോ ഈ ചിത്രത്തിൽ അഭിനയിച്ചിരിക്കുന്നത്. സ്റ്റൈൽ എന്ന മലയാള ചിത്രത്തിന് ശേഷം ടോവിനോ വില്ലൻ ആയി അഭിനയിച്ച ചിത്രമാണ് മാരി 2 . ബാലാജി മോഹൻ സംവിധാനം ചെയ്ത ഈ ചിത്രം നിർമ്മിച്ചതും ധനുഷ്  ആണ്. സായി പല്ലവി ആണ് ഈ ചിത്രത്തിലെ നായിക.