ബ്രേക്കിംഗ് ബാഡിലെ വാൾട്ടർ വൈറ്റ് ലുക്കിൽ ടോവിനോയുടെ അച്ഛൻ; ഫാദേഴ്‌സ് ഡേ ആശംസകൾ നേർന്നു താരം..!

ലോക പ്രശസ്തമായ ടിവി/ വെബ് സീരീസുകളിൽ ഒന്നാണ് അമേരിക്കൻ ക്രൈം ഡ്രാമ സീരിസായ ബ്രേക്കിംഗ് ബാഡ്. വിൻസ് ഗില്ലിഗൻ സംവിധാനം ചെയ്ത ഈ സീരിസ് 2013 സെപ്റ്റംബറിൽ തുടങ്ങി അഞ്ചു സീസണുകളിലായി 62 എപ്പിസോഡുകളിലൂടെയാണ് കഥ പറഞ്ഞത്. ലോകത്തെ തന്നെ ഏറ്റവും കൂടുത റേറ്റിങ് ലഭിച്ച ടിവി സീരീസാണ് ബ്രേക്കിംഗ് ബാഡ് എന്ന് പറയാം. അതിലെ പ്രധാന കഥാപാത്രങ്ങളായ വാൾട്ടർ വൈറ്റ്, ജെസി പിങ്ക്മാൻ എന്നിവരെ അവതരിപ്പിച്ചു കയ്യടി നേടിയത് പ്രശസ്ത നടന്മാരായ ബ്രയാൻ ക്രാൻസ്ടൻ, ആരോൺ പോൾ എന്നിവരാണ്. അതിലെ ഇരുവരുടേയും ലുക്കുകളും ഏറെ ശ്രദ്ധിക്കപ്പെട്ടിരുന്നു. ഇപ്പോഴിതാ വാൾട്ടർ വൈറ്റ് എന്ന കഥാപാത്രത്തിന്റെ ലുക്കിലുള്ള തന്റെ അച്ഛന്റെ ചിത്രം സോഷ്യൽ മീഡിയ വഴി പങ്കു വെച്ചിരിക്കുകയാണ് മലയാളത്തിന്റെ യുവ താരം ടോവിനോ തോമസ്. ഫാദേഴ്‌സ് ഡേ ആയി ലോകമെങ്ങും ആഘോഷിക്കുന്ന ഈ ദിവസം അച്ഛന് ആശംസകൾ അറിയിച്ചു കൊണ്ടാണ് ടോവിനോ തോമസ് ഈ ചിത്രം പങ്കു വെച്ചിരിക്കുന്നത്.

തന്റെ അച്ഛനാണ് തന്റെ ഹീറോ എന്നും ടോവിനോ തോമസ് ചിത്രം പങ്കു വെച്ച് കൊണ്ട് പറയുന്നു. ബ്രേക്കിംഗ് ബാഡിലെ വാൾട്ടർ വൈറ്റ് സ്റ്റൈലിനെ കുറിച്ചും തന്റെ സോഷ്യൽ മീഡിയ പോസ്റ്റിൽ ടോവിനോ തോമസ് സൂചിപ്പിച്ചിട്ടുണ്ട്. ഏതായാലും ഈ യുവ താരം പങ്കു വെച്ച തന്റെ അച്ഛന്റെ ചിത്രത്തിനും ആശംസകൾക്കും വലിയ സ്വീകരണമാണ് ആരാധകർ നൽകുന്നത്. അഡ്വക്കേറ്റ് ആയിരുന്ന ടോവിനോ തോമസിന്റെ അച്ഛന്റെ പേര് ഇല്ലിക്കൽ തോമസ് എന്നാണ്. ഇല്ലിക്കൽ തോമസിന്റെയും ഷീല തോമസിന്റെയും ഏറ്റവും ഇളയ മകനായാണ് ടോവിനോ ജനിച്ചത്. തൃശൂർ ഇരിങ്ങാലക്കുട സദേശിയാണ് ടോവിനോ. ഒരു സഹോദരനും സഹോദരിയുമാണ് ടോവിനോ തോമസിനുള്ളത്.