ദുൽഖറിന്റെ ചിത്രങ്ങൾക്ക് കേരളത്തിൽ വിലക്ക്; തീരുമാനം ഫിയോക്കിന്റെ; കൂടുതൽ വിവരങ്ങൾ ഇതാ..!

മലയാളത്തിന്റെ യുവ താരങ്ങളിൽ ഒരാളായ ദുൽഖർ സൽമാൻ നായകനായി എത്തുന്ന ചിത്രങ്ങൾക്കും, അതുപോലെ ദുൽഖർ തന്റെ പ്രൊഡക്ഷൻ ബാനറിൽ നിർമ്മിക്കുന്ന ചിത്രങ്ങൾക്കും വിലക്കേർപ്പെടുത്തിയിരിക്കുകയാണ് കേരളത്തിലെ തീയേറ്റർ സംഘടനയായ ഫിയോക്. ദുൽഖർ നായകനായ സല്യൂട്ട് എന്ന ചിത്രം ഒടിടി റിലീസ് ആയി നൽകിയതിന് എതിരെ ഉള്ള പ്രതിഷേധവും ശിക്ഷ നടപടിയുമാണ് ഈ വിലക്ക് എന്നാണ് സൂചന. കഴിഞ്ഞ ദിവസം നടന്ന സംഘടനാ യോഗത്തിലാണ് ഫിയോക് ഈ തീരുമാനം കൈക്കൊണ്ടത്. ദുൽഖറിന്റെ കുറുപ്പ് റിലീസ് സമയത്തു എല്ലാവിധ പിന്തുണയും നൽകിയിട്ടും, തീയേറ്റർ റിലീസിന് കരാർ ഉണ്ടായിരുന്ന സല്യൂട്ട് ഒറ്റിറ്റിക്ക് നൽകിയത് ഒരിക്കലും അംഗീകരിക്കാൻ കഴിയുന്ന പ്രവർത്തി അല്ല എന്നാണ് ഫിയോക് പറയുന്നത്. കോവിഡ് മൂലം റിലീസ് നീണ്ടു പോയെങ്കിലും, ഇപ്പോൾ നൂറു ശതമാനം ആളുകളെ കയറ്റി സിനിമ പ്രവർത്തിപ്പിച്ചു കൊണ്ടിരിക്കുന്ന സാഹചര്യത്തിൽ ഈ ചിത്രം ഒടിടിക്കു നൽകിയത് തീർത്തും തെറ്റായ നടപടി ആണെന്നും ഫിയോക് പറയുന്നു.

വിലക്ക് എത്രകാലത്തേക്കു എന്നത് തീരുമാനിച്ചിട്ടില്ല. ഒടിടി റിലീസ് ചെയ്യുന്ന സിനിമകൾ മുൻകൂട്ടി അനുവാദം വാങ്ങി മാത്രമേ ചെയ്യാവു എന്നാണ് കേരളത്തിലെ സിനിമ സംഘടനകൾ പാലിക്കുന്ന നിയമം. അത്കൊണ്ട് തന്നെ തീയേറ്റർ റിലീസ് ആണെന്ന് പറഞ്ഞു ഷൂട്ട് ചെയ്ത ചിത്രങ്ങൾ ഒറ്റിറ്റിക്ക് കൊടുക്കുന്നത് വലിയ പ്രതിഷേധത്തിനാണ് ഇടയാക്കുന്നത്. ബോബി- സഞ്ജയ് ടീം രചിച്ചു റോഷൻ ആൻഡ്രൂസ് ഒരുക്കിയ സല്യൂട്ട് എന്ന ചിത്രം ഈ വരുന്ന മാർച്ച് പതിനെട്ടിന് ആണ് സോണി ലൈവ് പ്ലാറ്റ്‌ഫോമിൽ റിലീസ് ചെയ്യുക. അരവിന്ദ് കരുണാകരൻ എന്ന പോലീസ് ഓഫീസർ ആയാണ് ദുൽകർ സൽമാൻ ഈ ചിത്രത്തിൽ അഭിനയിച്ചിരിക്കുന്നത്.