ഇന്ത്യൻ സിനിമയിലെ ബ്രഹ്മാണ്ഡ ചിത്രത്തിന്റെ ബ്രഹ്മാണ്ഡ ലോഞ്ച് ഒരുങ്ങുന്നു..!

സൈ രാ നരസിംഹ റെഡ്‌ഡി എന്ന മെഗാ സ്റ്റാർ ചിരഞ്ജീവി ചിത്രമാണ് ഇപ്പോൾ സോഷ്യൽ മീഡിയയുടെ ചർച്ചാ വിഷയം. ഇന്ത്യൻ സിനിമയിലെ തന്നെ ബ്രഹ്മാണ്ഡ ചിത്രങ്ങളിൽ ഒന്നായ ഈ ചിത്രം വരുന്ന ഒക്ടോബർ രണ്ടിന് ലോകം മുഴുവൻ റിലീസ് ചെയ്യും. അതിനു മുൻപ് ഈ വരുന്ന സെപ്റ്റംബർ 22 നു ഈ ചിത്രത്തിന്റെ പ്രീ- റിലീസ് ലോഞ്ച് നടക്കുകയാണ്. ഏകദേശം പത്തു ലക്ഷത്തോളം ആളുകൾ പങ്കെടുക്കുന്ന, ഇന്ത്യൻ സിനിമ കണ്ട ഏറ്റവും വലിയ സിനിമാ ലോഞ്ച് ആവും ഹൈദരാബാദിൽ വെച്ച് നടക്കുക. രജനികാന്ത് അടക്കമുള്ള ഇന്ത്യൻ സിനിമയിലെ സൂപ്പർ താരങ്ങൾ എല്ലാം ഈ ചടങ്ങിന്റെ ഭാഗമാകും എന്നാണ് റിപ്പോർട്ടുകൾ പറയുന്നത്. കേരളത്തിൽ വമ്പൻ റിലീസ് ആയി ഈ ചിത്രം എത്തിക്കുന്നത് ജെമിനി സ്റ്റുഡിയോസ് ആണ്. വമ്പൻ താര നിര അണിനിരക്കുന്ന ഈ ചിത്രത്തിന്റെ ടീസർ വലിയ ഹിറ്റ് ആയി മാറിയിരുന്നു.

മലയാളത്തിന്റെ സൂപ്പർ താരമായ മോഹൻലാൽ ആയിരുന്നു ഈ ചിത്രത്തിന്റെ മലയാളം ടീസറിന് ആമുഖം നൽകിയത്. മെഗാ സ്റ്റാർ ചിരഞ്ജീവിക്ക്‌ ഒപ്പം വിജയ് സേതുപതി, അമിതാബ് ബച്ചൻ, നയൻ താര, കിച്ച സുദീപ്, ജഗപതി ബാബു, തമന്ന, അനുഷ്ക ഷെട്ടി, തുടങ്ങിയവർ ഈ ചിത്രത്തിലെ പ്രധാന കഥാപാത്രങ്ങൾക്കു ജീവൻ നൽകുന്നു. ചിരഞ്ജീവിയുടെ മകൻ റാം ചരൺ നിർമ്മിച്ചിരിക്കുന്ന ഈ ചിത്രം സംവിധാനം ചെയ്തിരിക്കുന്നത് സുരീന്ദർ റെഡ്‌ഡി ആണ്. 270 കോടി രൂപ മുതൽ മുടക്കിൽ ആണ് ഈ ചിത്രം ഒരുക്കിയിരിക്കുന്നത്. അമിത് ത്രിവേദി സംഗീതം പകർന്ന ഈ ചിത്രം എഡിറ്റ് ചെയ്തിരിക്കുന്നത് ശ്രീകർ പ്രസാദും ഇതിനു ദൃശ്യങ്ങൾ ഒരുക്കിയത് ആർ രത്‌നവേലുവും ആണ്.