തരംഗം സൃഷ്ടിച്ച് തരംഗത്തിലെ ആദ്യ വീഡിയോ ഗാനം

നവാഗതനായ ഡൊമിനിക് അരുൺ സംവിധാനം ചെയ്യുന്ന ടോവിനോ ചിത്രമായ തരംഗത്തിലെ ആദ്യ വീഡിയോ ഗാനം റിലീസ് ചെയ്ത് രണ്ട് ദിവസത്തിനുള്ളിൽ രണ്ട് ലക്ഷത്തോളം കാഴ്ചക്കാരുമായി മുന്നോട്ട്. കുറച്ച് ദിവസം മുമ്പ് പുറത്തിറങ്ങിയ ‘മിന്നുണ്ടല്ലോ മുല്ലപോലെ’ എന്ന ലിറിക്കൽ വീഡിയോയും സോഷ്യൽ മീഡിയയിൽ ഹിറ്റായിരുന്നു .

ചുരുങ്ങിയ സമയം കൊണ്ട് ‘മിന്നുണ്ടല്ലോ മുല്ലപോലെ’ തന്നെ ഗാനം ഏറെ ശ്രദ്ധ നേടിയിരുന്നു. ടോവിനോ പോലീസ് വേഷത്തിൽ എത്തുന്ന ചിത്രം ഒരു ബ്ലാക് കോമഡി ത്രില്ലർ മൂവിയാണ്.

ഏറെ പ്രതീക്ഷയുള്ള ടോവിനോ ചിത്രമാണ് തരംഗം. ധനുഷിന്റെ പ്രൊഡക്ഷൻ ആയ വണ്ടർബാർസ് ആണ് ചിത്രം നിർമിക്കുന്നത്. ധനുഷ് നിർമിക്കുന്ന ആദ്യ മലയാളചിത്രം എന്ന പ്രത്യേകതയും തരംഗത്തിന് ഉണ്ട്.

ടോവിനോക്കൊപ്പം ബാലുവർഗീസ്, വേദിക എന്നിവരും ചിത്രത്തിൽ കേന്ദ്രകഥാപാത്രങ്ങൾ ആവുന്നുണ്ട്. അശ്വിൻ രഞ്ജു സംഗീതം നിർവഹിക്കുന്ന തരംഗത്തിന്റെ ഛായാഗ്രാഹകൻ ദീപക് ഡി മേനോൻ ആണ്.

മൃത്യുഞ്ജയം എന്ന ഏറെ ശ്രദ്ധേയമായ ഷോർട്ട് ഫിലിം സംവിധാനം ചെയ്ത ഡൊമിനിക് അരുണിന്റെ ആദ്യ മുഴുനീള ചിത്രമാണ് തരംഗം. ഈ അടുത്ത് തന്നെ തരംഗം തീയറ്ററുകളിൽ എത്തുമെന്നാണ് അണിയറപ്രവർത്തകർ അറിയിച്ചത്.