‘നീങ്ക കവലപ്പെടാതെ തമ്പീ’; പട്ടാളക്കാരനുമായുള്ള ദളപതിയുടെ ഫോൺ സംഭാഷണം വൈറൽ…

ഇന്ത്യൻ സിനിമയിലെ തന്നെ ഏറ്റവും വലിയ ആരാധക വൃന്ദമുള്ള നടന്മാരിൽ ഒരാളാണ് ദളപതി വിജയ്. തന്റെ ആരാധകരെ സ്വന്തം സഹോദരന്മാരെ പോലെ കാണുന്ന വിജയ് അവരുടെ ഏതു കാര്യത്തിനും പറ്റുമെങ്കിൽ ഓടിയെത്തുന്ന കാഴ്ചയും നമ്മൾ കണ്ടിട്ടുണ്ട്. ഇപ്പോഴിതാ ഒരിക്കൽ കൂടി വിജയും ആരാധകരും തമ്മിലുള്ള ബന്ധം വെളിപ്പെടുത്തുന്ന ഒരു സംഭവം പുറത്തു വന്നിരിക്കുകയാണ്. പട്ടാളക്കാരനായ തന്റെ ഒരു ആരാധകനുമായി വിജയ് നടത്തിയ ടെലിഫോൺ സംഭാഷണം ആണ് ഇപ്പോൾ സോഷ്യൽ മീഡിയ വഴി വൈറൽ ആയിരിക്കുന്നത്. ആ സംഭാഷണത്തിന്റെ ഓഡിയോ, വീഡിയോ ക്ലിപ്പുകൾ ഇപ്പോൾ സിനിമാ പ്രേമികളുടെ ഇടയിൽ വൻ പ്രചാരം നേടി കഴിഞ്ഞു.

തമിഴ് നാട് കൂടല്ലൂർ സ്വദേശി ആയ തമിഴ് സെൽവൻ എന്ന ആരാധകനെയാണ് വിജയ് വിളിച്ചത്. 17 വർഷമായി പട്ടാളത്തിൽ ജോലി ചെയ്യുന്ന തമിഴ് സെൽവൻ വിജയുടെ ആരാധകൻ ആണ്. ഇത്തവണ ലീവിന് വന്ന തമിഴ് സെൽവന് പുൽവാമ ഭീകരാക്രമണത്തിന്റെ പശ്ചാത്തലത്തിൽ ലീവ് വേഗം ക്യാൻസൽ ചെയ്ത് കാശ്മീരിലേക്കു പോവേണ്ടതായി വന്നു. തേനി വിജയ് ഫാൻസ് അസോസിയേഷൻ പ്രസിഡന്റ് പാണ്ടി വഴി തമിഴ് സെൽവന്റെ കാര്യം അറിഞ്ഞ വിജയ് അദ്ദേഹത്തെ ഉടൻ വിളിച്ചു സംസാരിക്കുകയായിരുന്നു. വിഷമിക്കേണ്ട എന്നും ഒരു പ്രശ്നവും ഉണ്ടാവില്ല എന്നും സന്തോഷവാനായി ഇരിക്കാനും വിജയ് തമിഴ് സെൽവനോട് പറഞ്ഞു. ജോലി കഴിഞ്ഞു എത്തുമ്പോൾ നമ്മുക്ക് നേരിട്ടു കാണാം എന്നും വിജയ് പറയുന്നു. വിജയ്‌യുടെ കടുത്ത ആരാധകൻ ആണ് താനെന്നും വിളിച്ചതിൽ ഏറെ സന്തോഷം ഉണ്ടെന്നും തമിഴ് സെൽവൻ വിജയോട് മറുപടി പറയുന്നും ഉണ്ട്.