ഇതിഹാസ സംവിധായകനൊപ്പം അവസരം; നന്ദി പറഞ്ഞു ജേക്‌സ് ബിജോയ്..!

മലയാള സിനിമയിലെ മാസ്റ്റർ ഡയറക്ടർ ആണ് ജോഷി. 1978 ഇൽ സിനിമ സംവിധാനം ചെയ്ത് തുടങ്ങിയ അദ്ദേഹം മലയാളത്തിലെ എല്ലാ സൂപ്പർ താരങ്ങൾക്കും ഹിറ്റുകൾ സമ്മാനിച്ചിട്ടുള്ള സംവിധായകൻ ആണ്. ന്യൂ ഡൽഹി എന്ന ചിത്രത്തിലൂടെ മമ്മൂട്ടിക്ക് സൂപ്പർ താര പദവി സമ്മാനിച്ച അദ്ദേഹം ഒരുക്കിയ മിക്ക ചിത്രങ്ങളും മലയാള സിനിമാ പ്രേമികളുടെ പ്രീയപ്പെട്ടവയാണ്. ജനുവരി ഒരോർമ്മ, നാടുവാഴികൾ, സംഘം, ലേലം, പത്രം, നായർ സാബ്, നമ്പർ 20 മദ്രാസ് മെയിൽ, നരൻ, 20-20, റണ് ബേബി റണ്, ക്രിസ്ത്യൻ ബ്രദേഴ്‌സ് തുടങ്ങി ഒട്ടേറെ സൂപ്പർ ഹിറ്റുകൾ അദ്ദേഹത്തിന്റെ പേരിൽ ഉണ്ട്. ഇപ്പോഴിതാ ചെറിയ ഒരിടവേളയ്ക്ക് ശേഷം പൊറിഞ്ചു മറിയം ജോസ് എന്ന ചിത്രമൊരുക്കി തിരിച്ചു വരികയാണ് അദ്ദേഹം. ജോജു ജോർജ്, ചെമ്പൻ വിനോദ് എന്നിവർ നായക വേഷങ്ങളിൽ എത്തുന്ന ഈ ചിത്രത്തിൽ നായികയായി എത്തുന്നത് നൈല ഉഷ ആണ്. ഈ ചിത്രത്തിന് സംഗീത സംവിധാനം ചെയ്യാൻ അവസരം ലഭിച്ചതിന്റെ സന്തോഷത്തിൽ ആണ് യുവ സംഗീത സംവിധായകൻ ജേക്‌സ് ബിജോയ് ഇപ്പോൾ.

താൻ എന്നും ആരാധിക്കുന്ന സംവിധായകൻ ആണ് ജോഷി സർ എന്നും അദ്ദേഹത്തിന്റെ ഒട്ടേറെ ചിത്രങ്ങൾ തൻറെ പ്രീയപ്പെട്ടവ ആണെന്നും ജേക്‌സ് ബിജോയ് പറയുന്നു. അദ്ദേഹം ഒരുക്കുന്ന ഈ പുതിയ പ്രോജക്റ്റിൽ തനിക്കും അവസരം ലഭിച്ചത് വലിയ ഭാഗ്യം ആയാണ് ഈ യുവ സംഗീത സംവിധായകൻ കരുതുന്നത്. ചിത്രത്തിന്റെ നിർമ്മാതാവ് ഡേവിഡ് കാച്ചപ്പിള്ളിക്കും ജേക്‌സ് നന്ദി പറയുന്നു. നവാഗതനായ അഭിലാഷ് എൻ ചന്ദ്രൻ തിരക്കഥ ഒരുക്കിയ ഈ ചിത്രത്തിന് വേണ്ടി ക്യാമറ ചലിപ്പിക്കുന്നത് അജയ് ഡേവിഡ് കാച്ചപ്പിള്ളി ആണ്.