തരംഗമാകാൻ ‘തല’; അജിത്ത് ചിത്രം വലിമൈയുടെ ബുക്കിംഗ് ജപ്പാനിൽ ആരംഭിച്ചു..!

തമിഴകത്തിന്റെ തല അജിത് കുമാർ നായകനായി എത്തുന്ന ഏറ്റവും പുതിയ ചിത്രമാണ് വലിമൈ. ഷൂട്ടിംഗ് ആരംഭിച്ചപ്പോൾ മുതൽ ചർച്ചകളിൽ നിറഞ്ഞു നിന്ന ഈ ചിത്രം ഈ മാസം ഇരുപത്തിനാലിനു ആഗോള റിലീസ് ആയി എത്തുകയാണ്. തീരൻ അധികാരം ഒൻഡ്രു, നേർക്കൊണ്ട പാർവൈ എന്നീ വമ്പൻ ഹിറ്റായ ചിത്രങ്ങൾക്ക് ശേഷം എച്ച് വിനോദ് സംവിധാനം ചെയ്തിരിക്കുന്ന ഈ ചിത്രം സിനിമാ പ്രേമികളും അജിത് ആരാധകരും ഏറ്റവും കൂടുതൽ കാത്തിരിക്കുന്ന ഒരു ചിത്രമാണ്. ഇന്ത്യൻ സിനിമയിൽ തന്നെ ഏറ്റവും കൂടുതൽ പ്രേക്ഷകർ കാത്തിരിക്കുന്ന ചിത്രങ്ങളിൽ ഒന്നായ വലിമൈയുടെ ട്രൈലെർ, ടീസർ, പോസ്റ്ററുകൾ തുടങ്ങിയവയൊക്കെ വലിയ രീതിയിൽ ആണ് ട്രെൻഡിങ് ആയതു. ഇപ്പോഴിതാ ആഗോള തലത്തിൽ ഈ ചിത്രത്തിന്റെ അഡ്വാൻസ് ബുക്കിംഗ് ആരംഭിച്ചിരിക്കുകയാണ്. ലോകമെമ്പാടുമുള്ള വിവിധ നഗരങ്ങളില്‍ റിലീസ് ചെയ്യാൻ പോകുന്ന ഈ ചിത്രം തമിഴ്, തെലുങ്ക്, കന്നഡ, ഹിന്ദി തുടങ്ങി ഒന്നിലധികം ഭാഷകളിലാണ് എത്തുക.

ഇപ്പോൾ ഈ ചിത്രത്തിന്റെ ബുക്കിഗ് ജപ്പാനിലും ആരംഭിച്ചിരിക്കുകയാണ്. അതോടു കൂടി ഈ ചിത്രത്തിന് വലിയ ആഗോള ശ്രദ്ധയാണ് ലഭിച്ചിരിക്കുന്നത് എന്ന് പറയാം. പ്രശസ്ത ബോളിവുഡ് സിനിമാ നിർമ്മാതാവായ ബോണി കപൂർ നിർമ്മിച്ച ഈ ചിത്രത്തിൽ അജിത്തിന് പുറമേ ഹുമ ഖുറേഷി, യോഗി ബാബു, കാർത്തികേയ, സുമിത്ര, അച്ച്യുത്‌ കുമാർ, പേർളി മാണി, ധ്രുവൻ, പുകഴ്, പാവൽ നവഗീതൻ എന്നിവരും അഭിനയിച്ചിരിക്കുന്നു. യുവാൻ ശങ്കർ രാജയാണ് ഇതിന്റെ സംഗീത സംവിധായകൻ. നീരവ് ഷാ കാമറ ചലിപ്പിച്ച ഈ ചിത്രം എഡിറ്റ് ചെയ്തത് വിജയ് വേലുക്കുട്ടി ആണ്. ഞെട്ടിക്കുന്ന ആക്ഷൻ സീനുകൾ ആണ് ഈ ചിത്രത്തിന്റെ ഹൈലൈറ്റ് എന്ന് ഇതിന്റെ ട്രൈലെർ സൂചിപ്പിക്കുന്നു.

ഫോട്ടോ കടപ്പാട്: ട്വിറ്റർ