ആരാധകരെ ഇളക്കിമറിക്കാൻ തല അജിത് വീണ്ടും; അജിത് കുമാർ-ശിവ ചിത്രം ഷൂട്ടിങ് തീയതി പ്രഖ്യാപിച്ചു..

തമിഴിലെ ഏറ്റവും വലിയ സൂപ്പർതാരങ്ങളിൽ ഒരാളായ അജിത് കുമാറിന്റെ പുതിയ ചിത്രത്തിനായി ആരാധകർക്ക് കാത്തിരിക്കുകയാണ്. എന്നാൽ കാത്തിരിപ്പുകൾക്ക് എല്ലാം വിരാമമായി പുതുചിത്രം വിശ്വാസം ഷൂട്ടിംഗ് ആരംഭിക്കുന്നു എന്ന വാർത്തയാണ് ഇപ്പോൾ പുറത്തു വരുന്നത്. അജിത്തിന്റെ മുൻ ചിത്രങ്ങൾ സംവിധാനം ചെയ്ത ശിവ തന്നെയാണ് ഈ മാസ്സ് ആക്ഷൻ ചിത്രവും സംവിധാനം ചെയ്യുന്നത്. അജിത്തിനെ നായകനാക്കി ശിവ മുൻപ് ചെയ്ത ചിത്രങ്ങളാണ് വീരം, വേദാളം, വിവേഗം തുടങ്ങിയവ. എല്ലാ ചിത്രങ്ങളും തന്നെ ആരാധകർക്കുള്ള തട്ടുപൊളിപ്പൻ ചിത്രങ്ങൾ തന്നെയായിരുന്നു. വമ്പൻ ബജറ്റിൽ ഒരുക്കിയ മുൻ ചിത്രം വിവേഗം വേണ്ടത്ര രീതിയിൽ ശ്രദ്ധിക്കപ്പെട്ടില്ല എന്നുമാത്രമല്ല ചിത്രം ബോക്സ് ഓഫീസിൽ ഒരു വലിയ പരാജയം ആകുകയും ചെയ്തിരുന്നു. എങ്കിലും മുൻചിത്രങ്ങളുടെ വലിയ വിജയം പുതിയ ചിത്രത്തിലൂടെ ആവർത്തിക്കുമെന്ന പ്രതീക്ഷയിലാണ് ആരാധകരും പ്രേക്ഷകരും.

ആക്ഷന് ഏറെ പ്രാധാന്യം നൽകി ഒരുക്കുന്ന വിശ്വാസം മുൻപുതന്നെ ഷൂട്ടിംഗ് ആരംഭിക്കാനായി പദ്ധതിയിട്ടിരുന്നെങ്കിലും തമിഴ് സിനിമാ സംഘടനകളുടെ സമരംമൂലം വൈകുകയായിരുന്നു. എന്തുതന്നെയായാലും പ്രശ്നങ്ങളെല്ലാം രമ്യമായി പരിഹരിച്ചതിനെതുടർന്ന് ചിത്രം അടുത്ത മാസം തന്നെ ചിത്രീകരണം ആരംഭിക്കാനാണ് തീരുമാനിച്ചിരിക്കുന്നത്. മെയ് നാലിന് ചിത്രത്തിന്റെ ഷൂട്ടിംഗ് ആരംഭിക്കും. ബിഗ് ബജറ്റിൽ ഒരുക്കുന്ന ഈ ചിത്രത്തിലെ നായികയായി എത്തുന്നത് നയൻതാരയാണ്. ഡി. ഇമ്മൻ ചിത്രത്തിനായി സംഗീതം ഒരുക്കുന്നു. ചിത്രം പൊങ്കൽ റിലീസായി അടുത്തവർഷം ആദ്യം എത്തും എന്നാണ് അറിയാൻ കഴിയുന്നത്. ആരാധകരുടെയും പ്രേക്ഷകരുടേയും പ്രതീക്ഷ പോലെ തന്നെ മികച്ച ഒരു ചിത്രം ഉണ്ടാകുമെന്ന് പ്രതീക്ഷിക്കാം.