മമ്മൂട്ടിയുടെ ഈയടുത്ത് കണ്ടതിൽ വച്ച് ഏറ്റവും മികച്ച കഥാപാത്രമായിരിക്കും അങ്കിളിലേത് ജോയി മാത്യു ഉറപ്പുതരുന്നു..

ഈ വരുന്ന വെള്ളിയാഴ്ച തിയേറ്ററുകളിലെത്തുന്ന മെഗാസ്റ്റാർ മമ്മൂട്ടി ചിത്രം അങ്കിളിനെപ്പറ്റിയാണ് തിരക്കഥാകൃത്ത് ജോയ് മാത്യു മനസ്സുതുറന്നത്. ചിത്രത്തിനെപ്പറ്റി വാചാലനായ അദ്ദേഹം തന്റെ മുൻ ചിത്രം ഷട്ടറിനെക്കാൾ വളരെ മികച്ചതായിരിക്കുമെന്ന് മുൻപ് പരാമർശം നടത്തിയിരുന്നു. ഷട്ടറിനെക്കാൾ മികച്ച ചിത്രമായിരിക്കും അങ്കിൾ ഇല്ലെങ്കിൽ താൻ തന്റെ പണി നിർത്തും എന്ന് ജോയ് മാത്യു പറഞ്ഞത് അന്ന് വളരെയധികം ചർച്ചയായിരുന്നു. അങ്ങനെയിരിക്കെയാണ് ജോയ് മാത്യു തന്റെ പുതിയ അഭിപ്രായവുമായി മാധ്യമങ്ങളിൽ എത്തുന്നത്. ചിത്രം മമ്മൂട്ടിയുടെ ഈയടുത്ത് കണ്ട ഏറ്റവും മികച്ച കഥാപാത്രം ആണെന്ന് ജോയ് മാത്യു അഭിപ്രായപ്പെട്ടു. അദ്ദേഹത്തിന്റെ മികച്ച പ്രകടനങ്ങളിൽ ഒന്നും ഈ ചിത്രത്തിലൂടെ കാണാനാകുമെന്ന് ജോയ് മാത്യു പറയുകയുണ്ടായി. എന്തുതന്നെയായാലും ഈ രണ്ട് പരാമർശങ്ങളിലൂടെ ചിത്രത്തിന്റെ പ്രതീക്ഷ വീണ്ടും ഇരട്ടിച്ചിരിക്കുകയാണ്.

രഞ്ജിത് എം. പദ്മകുമാർ എന്നിവരോടൊപ്പം നിരവധി വർഷം പ്രവർത്തിച്ചയാളാണ് സംവിധായകനായ ഗിരീഷ് ദാമോദരൻ. വർഷങ്ങളോളം പ്രവൃത്തിപരിചയമുള്ള ഗിരീഷ് ദാമോദരന്റെ ആദ്യ ചിത്രമായതിനാൽ തന്നെ അദ്ദേഹത്തിൻറെ സംവിധാനമികവ് കൂടി ചിത്രത്തിലൂടെ വിലയിരുത്തപ്പെടും. അത്യന്തം നിഗൂഢത നിറഞ്ഞ കഥാപാത്രമായാണ് മമ്മൂട്ടി ചിത്രത്തിൽ എത്തുന്നത് സുഹൃത്തിന്റെ മകളുമായി ഒരു അങ്കിൾ നടത്തുന്ന യാത്രയാണ് ചിത്രത്തിലൂടെ പറയുന്നത്. സാമൂഹിക പ്രതിബദ്ധത നിറഞ്ഞ വിഷയം കൂടി ചിത്രം കൈകാര്യം ചെയ്യുന്നുണ്ട് ചിത്രത്തിൽ മമ്മൂട്ടിയെ കൂടാതെ ജോയ് മാത്യു, കെ. പി. എ. സി. ലളിത, കാർത്തിക, മുത്തുമണി തുടങ്ങിയവർ അഭിനയിക്കുന്നു. മലയാളത്തിലെ ഏറ്റവും സീനിയർ ഛായാഗ്രഹകന്മാരിൽ ഒരാളായ അഴകപ്പനാണ് ചിത്രത്തിനായി ചായാഗ്രഹണം ഒരുക്കിയിരിക്കുന്നത്. അബ്ര ഫിലിംസും എസ്. ജെ ഫിലിംസും സംയുക്തമായി നിർമ്മിച്ച ചിത്രം ന്യൂ സൂര്യ മൂവീസ് വിതരണത്തിനെത്തിക്കുന്നു.