മോഹൻലാലിൻറെ ജന്മദിനം ആഘോഷമാക്കി തെലുങ്കു സിനിമാ ലോകവും…!

മലയാളത്തിന്റെ മഹാനടനും ഇന്ത്യൻ സിനിമയുടെ നടന വിസ്മയവുമായ മോഹൻലാലിന്റെ അറുപത്തിയൊന്നാം പിറന്നാൾ ആഘോഷമാക്കുകയാണ് ഇന്ന് ഇന്ത്യൻ സിനിമാ ലോകം. ഭാഷാ വ്യത്യസമില്ലാതെ ഇന്ത്യൻ സിനിമയിലെ എല്ലാ ഭാഷാ ഇന്ഡസ്ട്രികളിലും ആരാധകർ ഏറെയുള്ള ഒരേയൊരു മലയാള നടനാണ് മോഹൻലാൽ. അത്കൊണ്ട് തന്നെ മോഹൻലാലിന്റെ ജന്മദിനം മലയാള സിനിമയിൽ മാത്രം ഒതുങ്ങി നിൽക്കാതെ ഇന്ത്യൻ സിനിമാ ലോകം തന്നെ വലിയ രീതിയിലാണ് ആഘോഷിക്കുന്നത്. ഇപ്പോഴിതാ, മലയാളത്തിന്റെ മഹാനടന് ആശംസകൾ അറിയിച്ചു കൊണ്ട്, അദ്ദേഹത്തിന്റെ ഈ ജന്മദിനം ആഘോഷമാകുകയാണ് തെലുങ്കു സിനിമാ ലോകവും. ഇതിനോടകം തെലുങ്കു സിനിമയിലെ സൂപ്പർ താരങ്ങളായ ചിരഞ്ജീവി, വെങ്കിടേഷ്, മഹേഷ് ബാബു, റാം ചരൺ തുടങ്ങിയവർ മോഹൻലാലിന് തങ്ങളുടെ ജന്മദിന ആശംസകൾ അറിയിച്ചു കഴിഞ്ഞു.

ഇവർക്ക് പുറമെ, തങ്ങൾ കടുത്ത മോഹൻലാൽ ആരാധകരാണെന്നു തുറന്നു പറഞ്ഞിട്ടുള്ള അല്ലു അർജുൻ, പ്രഭാസ്, നാഗാർജുന, ജൂനിയർ എൻ ടി ആർ, എന്നിവരും അധികം വൈകാതെ തന്നെ സോഷ്യൽ മീഡിയയിലൂടെ തങ്ങളുടെ ആശംസകൾ അറിയിച്ചു കൊണ്ട് മുന്നോട്ടു വരുമെന്നാണ് ഏവരും പ്രതീക്ഷിക്കുന്നത്. മേല്പറഞ്ഞവരുടെ എല്ലാം തെലുങ്കിലെ ആരാധകർ ഇപ്പോൾ തന്നെ മോഹൻലാലിന് ആശംസകളുമായി ട്വിറ്റെർ, ഫേസ്ബുക് തുടങ്ങിയ സമൂഹ മാധ്യമങ്ങളിൽ നിറയുകയാണ്. മലയാളം, തമിഴ്, ഹിന്ദി, കന്നഡ, തെലുങ്ക് തുടങ്ങി എല്ലാ ഇന്ഡസ്ട്രികളിൽ നിന്നും മോഹൻലാലിന് ആശംസകൾ പ്രവഹിക്കുകയാണ്. കിച്ച സുദീപ്, രാധിക ശരത് കുമാർ, ശരത് കുമാർ, സിബി സത്യരാജ്, വിജയ് ആന്റണി, ജീവ, ഹൻസിക മൊട്‍വാനി, പൂനം ബജ്വ തുടങ്ങി ഒട്ടേറെ താരങ്ങൾ ഇതിനോടകം ആശംസകളുമായി എത്തിക്കഴിഞ്ഞു. മലയാളത്തിലെ അഭിനേതാക്കളും സാങ്കേതിക പ്രവർത്തകരുമെല്ലാം തങ്ങളുടെ താരരാജാവിനു ആശംസകളുമായി ഇന്നലെ മുതൽ തന്നെ എത്തിത്തുടങ്ങിയിരുന്നു.