മെഗാസ്റ്റാർ ചിത്രത്തിൽ നായികയായി ജ്യോതിക മലയാളത്തിൽ?; കൂടുതൽ വിവരങ്ങളിതാ

മലയാളത്തിന്റെ മെഗാസ്റ്റാർ മമ്മൂട്ടി ഈയടുത്തിടെയാണ് ബി ഉണ്ണികൃഷ്ണൻ സംവിധാനം ചെയ്യുന്ന ക്രിസ്റ്റഫർ എന്ന ചിത്രത്തിലെ തന്റെ ഭാഗങ്ങൾ പൂർത്തിയാക്കിയത്. അതിന് ശേഷം അദ്ദേഹം ചെയ്യാൻ പോകുന്ന ചിത്രമേതാണെന്ന ചർച്ചകളാണ് ഇപ്പോൾ നടന്ന് കൊണ്ടിരിക്കുന്നത്. മികച്ച പ്രേക്ഷക- നിരൂപക പ്രശംസ നേടിയ ദി ഗ്രേറ്റ് ഇന്ത്യൻ കിച്ചൻ പോലത്തെ ചിത്രങ്ങൾ സംവിധാനം ചെയ്ത ജിയോ ബേബിയാണ് അടുത്ത മമ്മൂട്ടി ചിത്രമൊരുക്കാൻ പോകുന്നതെന്ന വാർത്തകളാണ് വരുന്നത്. തന്റെ പുത്തൻ നിർമ്മാണ ബാനറായ മമ്മൂട്ടി കമ്പനിയുടെ ബാനറിൽ മമ്മൂട്ടി നിർമിക്കാൻ പോകുന്ന മൂന്നാമത്തെ ചിത്രമായിരിക്കും ഇതെന്നും വാർത്തകളുണ്ട്. ഇപ്പോഴിതാ, ഈ ചിത്രത്തിലെ നായികയെ കുറിച്ചുള്ള ചില റിപ്പോർട്ടുകളാണ് പുറത്ത് വരുന്നത്. പ്രശസ്ത തെന്നിന്ത്യൻ നായികയായ ജ്യോതിക ഈ ചിത്രത്തിലൂടെ വീണ്ടും മലയാളത്തിലെത്തുകയാണെന്ന വാർത്തകളാണ് വരുന്നത്.

ഔദ്യോഗികമായി ഇതുവരെ പ്രഖ്യാപിച്ചിട്ടില്ലെങ്കിലും ജ്യോതികയെ ഈ ചിത്രത്തിലേക്ക് ക്ഷണിച്ചിട്ടുണ്ടെന്നും, കഥ കേട്ട് സമ്മതം മൂളിയ അവർ വൈകാതെ കരാർ ഒപ്പ് വെക്കുമെന്നുമാണ് വാർത്തകൾ പറയുന്നത്. ഈ പ്രൊജക്റ്റ് ഒഫീഷ്യലായി പ്രഖ്യാപിക്കുന്നതിനൊപ്പം തന്നെ മമ്മൂട്ടിയും ജ്യോതികയുമുൾപ്പെടുന്ന താരനിരയെ കുറിച്ചും പ്രഖ്യാപനം വരുമെന്നാണ് സൂചന. ഏതായാലൂം ജ്യോതിക ഇതിന്റെ ഭാഗമായി എത്തുമെന്ന റിപ്പോർട്ടുകൾ ഇപ്പോൾ സോഷ്യൽ മീഡിയയിൽ വലിയ രീതിയിലാണ് പ്രചരിക്കുന്നത്. നേരത്തെ പ്രിയദർശൻ സംവിധാനം ചെയ്ത രാക്കിളിപ്പാട്ട് എന്ന ചിത്രത്തിലൂടെ ജ്യോതിക മലയാളത്തിൽ അഭിനയിച്ചിട്ടുണ്ട്. നിസാം ബഷീർ ഒരുക്കിയ റോഷാക്ക് ആണ് മമ്മൂട്ടിയുടെ അടുത്ത റിലീസ്. ഒക്ടോബർ റിലീസായ ഈ ചിത്രം നിർമ്മിച്ചതും മമ്മൂട്ടി തന്നെയാണ്. അതിന് മുൻപ് മമ്മൂട്ടി പുതിയ ബാനറിൽ നിർമ്മിച്ചത് ലിജോ ജോസ് പെല്ലിശ്ശേരി ഒരുക്കിയ നൻ പകൽ നേരത്ത് മയക്കമാണ്.