വീണ്ടും ഇരട്ട വേഷത്തിൽ സൂര്യ; ബാല ചിത്രത്തിന്റെ പുത്തൻ വിവരങ്ങളിതാ..!

തമിഴിലെ ഏറ്റവും മികച്ച സംവിധായകരിലൊരാളായ ബാലയുടെ പുതിയ ചിത്രത്തിൽ നായകനായെത്തുന്നത് നടിപ്പിൻ നായകൻ സൂര്യയാണ്. സൂര്യയുടെ കരിയർ തന്നെ മാറ്റി മറിച്ച സംവിധായകനാണ് ബാല. നന്ദ, പിതാമഹൻ എന്നീ ബാല ചിത്രങ്ങൾ സൂര്യയുടെ കരിയറിൽ വലിയ വഴിത്തിരിവുകളാണ് സൃഷ്ടിച്ചത്. ഇത് കൂടാതെ മായാവി എന്ന ചിത്രവും സൂര്യ- ബാല ടീമിൽ നിന്ന് പ്രേക്ഷകരുടെ മുന്നിലെത്തിയിട്ടുണ്ട്. പതിനെട്ട് വർഷത്തിന് ശേഷമാണു ഇപ്പോൾ ബാല ചിത്രത്തിൽ സൂര്യ നായകനായി വരുന്നതെന്ന് മാത്രമല്ല ഈ ചിത്രം നിർമ്മിക്കുന്നത് സൂര്യയും ഭാര്യയും നടിയുമായ ജ്യോതികയും ചേർന്നാണ്. മുകളിൽ പറഞ്ഞ മായാവിയെന്ന സൂര്യ- ബാല ചിത്രത്തിൽ നായികയായും ജ്യോതിക ജോലി ചെയ്തിട്ടുണ്ട്. വർഷങ്ങൾക്കു ശേഷം ബാല- സൂര്യ ടീം ഒന്നിച്ച ഈ ചിത്രം കടലിന്റെ പശ്‌ചാത്തലത്തിലാണ്‌ കഥ പറയുന്നതെന്നാണ് സൂചന.

ഇപ്പോഴിതാ സൂര്യ ഈ ചിത്രത്തിൽ ഇരട്ട വേഷത്തിലാണെത്തുന്നതെന്ന വാർത്തകളാണ് പുറത്തു വരുന്നത്. സിനിമയിൽ സൂര്യ അച്ഛനും മകനുമായാണ് എത്തുന്നതെന്നും അതിലൊരു കഥാപാത്രം ബധിരനാണെന്നും വാർത്തകൾ പറയുന്നുണ്ട്. അതുപോലെ തന്നെ ഇതിലെ നായികയായി ജ്യോതിക ഉണ്ടാകുമെന്നും അച്ഛൻ കഥാപാത്രത്തിന്റെ ജോഡിയായിരിക്കുമെന്നും സ്ഥിതീകരിക്കാത്ത വാർത്തകൾ പറയുന്നു. കൃതി ഷെട്ടി മറ്റൊരു നായികാ വേഷം ചെയ്യുന്ന ചിത്രത്തിൽ മലയാളി താരം മമിതാ ബൈജുവും അഭിനയിക്കുന്നുണ്ട്. ബാലസുബ്രഹ്മണ്യം ഛായാഗ്രഹണം നിർവഹിക്കുന്ന ഈ ചിത്രത്തിന് സംഗീതമൊരുക്കുന്നത് ജി വി പ്രകാശ് കുമാർ, എഡിറ്റ് ചെയ്യുന്നത് സതീഷ് സൂര്യ എന്നിവരാണ്. ഈ സിനിയ്ക്കു വേണ്ടി നിർമ്മിച്ച വീടുകൾ മത്സ്യത്തൊഴിലാളികൾക്ക് സൗജന്യമായി നൽകി സൂര്യ വാർത്തകളിൽ നിറഞ്ഞിരുന്നു. കന്യാകുമാരിയിൽ ഒട്ടേറെ വീടുകൾ നിറഞ്ഞ വലിയ സെറ്റാണ് ഈ ചിത്രത്തിന് വേണ്ടി നിർമ്മിച്ചത്.