മമ്മൂട്ടിക്കൊപ്പം സുരേഷ് ഗോപിയും; ബിഗ് ബഡ്ജറ്റ് ആക്ഷൻ ത്രില്ലർ ചിത്രം ആരംഭിക്കുന്നു

മലയാളത്തിന്റെ മെഗാസ്റ്റാർ മമ്മൂട്ടി ഇനി അഭിനയിക്കാൻ പോകുന്ന ചിത്രം സംവിധാനം ചെയ്യുന്നത് പ്രശസ്ത സംവിധായകനും രചയിതാവും എഡിറ്ററുമായ മഹേഷ് നാരായണനാണ്. മമ്മൂട്ടിക്കൊപ്പം ഫഹദ് ഫാസിൽ, കുഞ്ചാക്കോ ബോബൻ എന്നിവരും വേഷമിടുന്ന ഈ ബിഗ് ബഡ്ജറ്റ് ആക്ഷൻ ത്രില്ലർ ചിത്രം നിർമ്മിക്കുന്നത് ആന്റോ ജോസഫ്, കുഞ്ചാക്കോ ബോബൻ, ഫഹദ് ഫാസിൽ എന്നിവർ ചേർന്നാണ്. ഇപ്പോഴിതാ, ഈ ചിത്രത്തിൽ വളരെ നിർണ്ണായകമായ ഒരു വേഷത്തിൽ സൂപ്പർ സ്റ്റാർ സുരേഷ് ഗോപിയും അഭിനയിക്കുമെന്നാണ് വാർത്തകൾ വരുന്നത്. ഒരു വലിയ ഇടവേളക്ക് ശേഷമാണ് മമ്മൂട്ടി- സുരേഷ് ഗോപി ടീം ഒന്നിക്കുന്നതെന്നാണ് ഇതിന്റെ സവിശേഷത. അമേരിക്ക, ബ്രിട്ടൻ, ഡൽഹി എന്നിവിടങ്ങളിലായാണ് ഈ ചിത്രം ഷൂട്ട് ചെയ്യുക. ഏകദേശം 90 ദിവസത്തോളം ഷൂട്ടിംഗ് പ്ലാൻ ചെയ്തിരിക്കുന്ന ഈ ചിത്രം ഏപ്രിൽ മാസത്തിലാണ് ആരംഭിക്കുക.

ഇപ്പോൾ കുടുംബത്തോടൊപ്പം വെക്കേഷൻ ആഘോഷിക്കുന്ന മമ്മൂട്ടി ഏപ്രിൽ മാസത്തിൽ തന്നെ ഇതിൽ ജോയിൻ ചെയ്യും. വൈശാഖ് സംവിധാനം ചെയ്ത ടർബോ ആണ് മമ്മൂട്ടിയുടെ അടുത്ത റിലീസ്. മെയ് ഒൻപതിന് ആഗോള റിലീസായി എത്തുമെന്ന് കരുതപ്പെടുന്ന ഈ ബിഗ് ബജറ്റ് ആക്ഷൻ കോമഡി എന്റെർറ്റൈനെർ ചിത്രം രചിച്ചത് മിഥുൻ മാനുൽ തോമസാണ്. ഏകദേശം എഴുപത് കോടിയോളം മുതൽ മുടക്കിൽ ഈ ചിത്രം നിർമ്മിക്കുന്നത് മമ്മൂട്ടിയുടെ സ്വന്തം മമ്മൂട്ടി കമ്പനി തന്നെയാണ്. കന്നഡ താരം രാജ് ബി ഷെട്ടി, തെലുങ്ക് താരം സുനിൽ എന്നിവരും അഭിനയിക്കുന്ന ഈ ചിത്രത്തിൽ മലയാള യുവതാരം സണ്ണി വെയ്‌നും വേഷമിട്ടിട്ടുണ്ട്. ഡീനോ ഡെന്നിസ് ഒരുക്കിയ ബസൂക എന്ന ചിത്രവും മമ്മൂട്ടിയുടേതായി ഇനി റിലീസ് ചെയ്യാനുണ്ട്.