വീണ്ടും പോലീസ് വേഷത്തിൽ സുരേഷ് ഗോപി; സൂപ്പർഹിറ്റ് യുവസംവിധായകൻ തിരിച്ചു വരുന്നു

മലയാളത്തിന്റെ ആക്ഷൻ സൂപ്പർ സ്റ്റാർ സുരേഷ് ഗോപി വീണ്ടും മാസ്സ് പോലീസ് കഥാപാത്രമായി അഭിനയിക്കാൻ ഒരുങ്ങുകയാണ്. ഈ അടുത്തിടെ റിലീസ് ചെയ്ത് സൂപ്പർഹിറ്റായ ജോഷി ചിത്രം പാപ്പനിൽ പോലീസ് കഥാപാത്രമാണ് സുരേഷ് ഗോപി ചെയ്തത് എങ്കിലും, അതിൽ ഒരു റിട്ടയേർഡ് പോലീസ് ഓഫീസർ വേഷത്തിലാണ് അദ്ദേഹമെത്തിയത്. എന്നാൽ വീണ്ടും പോലീസ് യൂണിഫോമിൽ സുരേഷ് ഗോപിയെത്തുന്ന ഒരു മാസ്സ് ആക്ഷൻ ചിത്രവുമായി വരികയാണ് യുവ സംവിധായകരിൽ ശ്രദ്ധേയനായ ഹനീഫ് അദനി. മമ്മൂട്ടി നായകനായ ദി ഗ്രേറ്റ് ഫാദർ എന്ന സൂപ്പർ ഹിറ്റ് ചിത്രം സംവിധാനം ചെയ്ത് കൊണ്ടരങ്ങേറ്റം കുറിച്ച ഹനീഫ് അദനി, അതിന് ശേഷം മമ്മൂട്ടി തന്നെ നായകനായ ഷാജി പാടൂർ ചിത്രം അബ്രഹാമിന്റെ സന്തതികൾക്ക് തിരക്കഥയും രചിച്ചു. സൂപ്പർഹിറ്റായ ആ ചിത്രത്തിന് ശേഷം പിന്നെ നമ്മൾ ഹനീഫ് അദനിയെ കണ്ടത് സംവിധായകന്റെ കുപ്പായത്തിലാണ്.

നിവിൻ പോളി നായകനായ മിഖായേൽ എന്ന ആക്ഷൻ ചിത്രമാണ് അദ്ദേഹമൊരുക്കിയത്. ആന്റോ ജോസഫ് നിർമ്മിക്കാൻ പോകുന്ന ഹനീഫ് അദനിയുടെ പുതിയ ചിത്രം ഒരു പോലീസ് ഇൻവെസ്റ്റിഗേഷൻ ത്രില്ലറായാണ് എത്തുന്നത്. അങ്കമാലി ഡയറീസിലൂടെ പ്രേക്ഷകർക്ക് പ്രിയങ്കരിയായ ലിച്ചി നായികാ വേഷം ചെയ്യാൻ പോകുന്ന ഈ ചിത്രത്തിന്റെ ഷൂട്ടിംഗ് വൈകാതെ ആരംഭിക്കും. വമ്പൻ ബഡ്ജറ്റിലാണ് ഈ ഹനീഫ് അദനി- സുരേഷ് ഗോപി ചിത്രം ഒരുങ്ങുന്നതെന്നാണ് സൂചന. ജിബു ജേക്കബ് ഒരുക്കിയ മേം ഹൂം മൂസയാണ് സുരേഷ് ഗോപിയുടെ അവസാനം റിലീസ് ചെയ്ത ചിത്രം. അതിലെ പ്രകടനത്തിന് അദ്ദേഹത്തിന് പ്രേക്ഷകരിൽ നിന്ന് പ്രശംസ ലഭിച്ചിരുന്നു.