വമ്പൻ തിരിച്ചുവരവിനൊരുങ്ങി സുരേഷ് ഗോപി; മെഗാ ബഡ്ജറ്റ് ചിത്രത്തിലൂടെ വീണ്ടും വിക്രമിനൊപ്പം ഒന്നിക്കുന്നു….!!!

എന്ന് നിന്റെ മൊയ്‌ദീൻ എന്ന ചിത്രത്തിന് ശേഷം ആർ എസ് വിമൽ ഒരുക്കാൻ പോകുന്ന ബ്രഹ്മാണ്ഡ ചിത്രമാണ് മഹാവീർ കർണ്ണ. ചിയാൻ വിക്രം നായക വേഷത്തിൽ എത്തുന്ന ഈ ചിത്രത്തിന്റെ ചിത്രീകരണം അധികം വൈകാതെ തന്നെ ആരംഭിക്കും. ഇതിനു വേണ്ടിയുള്ള ചില പൂജ കർമ്മങ്ങൾ ഒക്കെ കുറച്ചു നാൾ മുന്നേ തിരുവനന്തപുരം പദ്മനാഭ  സ്വാമി ക്ഷേത്രത്തിൽ വെച്ച് നടന്നിരുന്നു. അന്ന് സംവിധായകൻ ആർ എസ് വിമലിനൊപ്പം പ്രശസ്ത മലയാള താരം സുരേഷ് ഗോപിയും ഉണ്ടായിരുന്നു. ഇപ്പോൾ വരുന്ന സ്ഥിതീകരിക്കാത്ത റിപ്പോർട്ടുകൾ പറയുന്നത് മഹാവീർ കർണ്ണയിൽ സുരേഷ് ഗോപിയും ഒരു പ്രധാന വേഷം ചെയ്യും എന്നാണ്. തമിഴിലും ഹിന്ദിയിലും ആയി വമ്പൻ ബഡ്ജറ്റിൽ ഒരുക്കുന്ന ഈ ചിത്രം ഒരു വിദേശ കമ്പനിയാണ് നിർമ്മിക്കാൻ പോകുന്നത്.

സുരേഷ് ഗോപി ഈ ചിത്രത്തിൽ ഏതു വേഷം ആണ് ചെയ്യുന്നത് എന്നൊന്നും ഇപ്പോൾ പ്രചരിക്കുന്ന റിപ്പോർട്ടുകളിൽ പറയുന്നില്ല. ഏതായാലും ഈ വാർത്തയുടെ സത്യാവസ്ഥ അറിയാൻ കാത്തിരിക്കുകയാണ് പ്രേക്ഷകർ. ഇതിനു മുൻപ് ഷങ്കർ ഒരുക്കിയ വിക്രം ചിത്രമായ ഐയിൽ സുരേഷ് ഗോപി വില്ലൻ ആയി എത്തിയിരുന്നു. അതിനു മുൻപ് സുരേഷ് ഗോപി നായകനായ മലയാള ചിത്രങ്ങളുടെ ഭാഗമായിട്ടുണ്ട് വിക്രം. അന്ന് പക്ഷെ വിക്രം സഹനടനായി അഭിനയിച്ചു വളർന്നു വരുന്ന കാലമാണ്. ഈ ചിത്രത്തിന് വേണ്ടി ശരീരം ഒരുക്കുകയാണ് വിക്രം ഇപ്പോൾ. അതിനൊപ്പം കുതിര സവാരിയും വാൾപ്പയറ്റും പഠിക്കുന്നുമുണ്ട് അദ്ദേഹം. മലയാളത്തിൽ അടുത്ത വർഷം ലേലം രണ്ടാം ഭാഗവുമായി എത്താൻ തയ്യാറെടുക്കുകയാണ്‌ സുരേഷ് ഗോപി. നിതിൻ രഞ്ജി പണിക്കർ ആണ് ഈ ചിത്രം സംവിധാനം ചെയ്യാൻ പോകുന്നത്.