സൺ‌ഡേ ഹോളിഡേ ഇനി തമിഴ് പേസും , ഒപ്പം തെലുങ്കും..!

യുവതാരം ആസിഫ് അലിയുടെ ഏറ്റവും പുതിയ ചിത്രമാണ് സൺ‌ഡേ ഹോളിഡേ. ജൂലൈ 14 നു റിലീസ് ചെയ്ത ഈ ചിത്രം മികച്ച പ്രേക്ഷകാഭിപ്രായം നേടി മുന്നോട്ടു കുതിക്കുകയാണ്. ബൈസൈക്കിൾ തീവ്സ് എന്ന ചിത്രത്തിന് ശേഷം ജിസ് ജോയ് സംവിധാനം ചെയ്ത ഈ ചിത്രം ഒരു ഫീൽ ഗുഡ് എന്റെർറ്റൈനെർ ആയാണ് ഒരുക്കിയിരിക്കുന്നത്. ആസിഫ് അലി, അപർണ്ണ, ബാലമുരളി, ശ്രീനിവാസൻ, ധർമ്മജൻ ബോൾഗാട്ടി, സിദ്ദിഖ് , ലാൽ ജോസ് എന്നിവർ പ്രധാന വേഷങ്ങളിൽ എത്തിയിരിക്കുന്ന ഈ ചിത്രം 8 ദിവസം കൊണ്ട് 5 കോടിയോളം രൂപ ഗ്രോസ് കളക്ഷൻ നേടി കഴിഞ്ഞതായാണ് ബോക്സ് ഓഫീസ് റിപ്പോർട്ടുകൾ സൂചിപ്പിക്കുന്നത്. ഇപ്പോൾ ലഭിക്കുന്ന വിവരം ശരിയാണെങ്കിൽ സൺ‌ഡേ ഹോളിഡേ അധികം വൈകാതെ തന്നെ തമിഴ്, തെലുങ്ക് ഭാഷകളിലേക്ക് റീമേക് ചെയ്യപ്പെടും.

ഈ ചിത്രത്തിന്റെ തമിഴ്, തെലുങ്ക് റീമേക് റൈറ്സ് വിറ്റു പോയി കഴിഞ്ഞതായി ചിത്രത്തോടടുത്ത വൃത്തങ്ങൾ സൂചിപ്പിച്ചു. ഈ വർഷം പുറത്തിറങ്ങിയ അഞ്ചാമത്തെ ആസിഫ് അലി ചിത്രമാണ് സൺ‌ഡേ ഹോളിഡേ. ഹണി ബീ 2 , ടേക്ക് ഓഫ്, അഡ്‌വെന്റർസ് ഓഫ് ഓമനക്കുട്ടൻ, അവരുടെ രാവുകൾ എന്നിവയാണ് ആസിഫ് അലി അഭിനയിച്ചു ഈ വർഷം പുറത്തിറങ്ങിയ മറ്റു ചിത്രങ്ങൾ.

ഇതിൽ ആസിഫ് അലി അതിഥി വേഷത്തിൽ എത്തിയ ടേക്ക് ഓഫും, ഇപ്പോൾ സൺ‌ഡേ ഹോളിഡെയും മാത്രമാണ് ബോക്സ് ഓഫീസ് വിജയം നേടിയത്. ഈ വാരം ആസിഫ് അലിയുടെ ഈ വർഷത്തെ ആറാമത്തെ റിലീസായ തൃശ്ശിവപേരൂർ ക്ലിപ്തം തീയേറ്ററുകളിൽ എത്തും. അരുൺ കുമാർ അരവിന്ദ് സംവിധാനം ചെയ്ത കാറ്റ് എന്ന ആസിഫ് അലി ചിത്രവും ഉടനെ തീയേറ്ററുകളിൽ എത്തുമെന്നാണ് ലഭിക്കുന്ന സൂചനകൾ.