കഥ പറയുമ്പോളിന് ശേഷം ശ്രീനിവാസൻ- എം. മോഹൻ ചിത്രം റിലീസിന് ഒരുങ്ങുന്നു…

നിരവധി കാലം സത്യൻ അന്തിക്കാടിന്റെ സഹായി ആയിരുന്ന എം. മോഹൻ ശ്രീനിവാസൻ തിരക്കഥ രചിച്ചു അഭിനയിച്ച കഥപറയുമ്പോൾ എന്ന ചിത്രത്തിലൂടെയാണ് സംവിധാന രംഗത്തേക്ക് കടന്നു വന്നത്. ചിത്രം ആ വർഷത്തെ ഏറ്റവും വലിയ ഹിറ്റുകളിൽ ഒന്നായി മാറി. ശ്രീനിവാസനോടൊപ്പം ഒരു സുപ്രധാന കഥാപാത്രം ആയി ചിത്രത്തിൽ മമ്മൂട്ടിയുടെ സാന്നിധ്യവും ഉണ്ടായിരുന്നു. ചിത്രത്തിന്റെ വിജയത്തിന് ശേഷം എം. മോഹൻ പൃഥ്വിരാജിനെ നായകനാക്കി ചെയ്ത ചിത്രമായിരുന്നു മാണിക്യക്കല്ല്. രണ്ടാമത്തെ ചിത്രവും തീയറ്ററുകളിൽ വിജയമായി. സത്യൻ അന്തിക്കാടിന്റെ ഒപ്പം 14 ചിത്രങ്ങളിൽ അസിസ്റ്റന്റ് ആയി ജോലി ചെയ്തത് കൊണ്ട് തന്നെ അന്തിക്കാടൻ ചിത്രങ്ങളിൽ കണ്ടിരുന്ന കുടുംബന്തരീക്ഷവും, ഗ്രാമീണ സൗന്ദര്യവുമെല്ലാം അദ്ദേഹത്തിന്റെ ചിത്രങ്ങളിലും നമുക്ക് കാണാൻ കഴിഞ്ഞിരുന്നു.

പിന്നീട് 916, സുരേഷ് ഗോപിയെ നായകനാക്കി മൈ ഗോഡ് എന്നീ സിനിമകൾ സംവിധാനം ചെയ്ത എം. മോഹൻ തന്റെ പുതിയ ചിത്രമായ അരവിന്ദന്റെ അതിഥികളിലൂടെ ശ്രീനിവാസനുമായി വീണ്ടും ഒത്തുച്ചേരുകയാണ്. ചിത്രത്തിൽ നായക കഥാപാത്രമായ മാധവനായി ശ്രീനിവാസൻ എത്തുന്നു തുല്യപ്രാധാന്യത്തോടെ മകൻ വിനീത് ശ്രീനിവാസൻ അരവിന്ദൻ എന്ന കഥാപാത്രമായും എത്തുന്നു. നിഖില വിമൽ ആണ് ചിത്രത്തിലെ നായിക ആയി എത്തുന്നത് അജു വർഗീസ്, ശാന്തി കൃഷ്ണ, ഉർവശി തുടങ്ങിയവർ ചിത്രത്തിൽ അണി നിരക്കുന്നു. കഴിഞ്ഞ വർഷം തരംഗം സൃഷ്ടിച്ച ഷാൻ റഹ്മാൻ – വിനീത് ശ്രീനിവാസൻ കൂട്ടുകെട്ടിൽ പിറന്ന സൂപ്പർഹിറ്റ് ഗാനം ജിമിക്കി കമ്മലിനും, ഈ വർഷം പുറത്തിറങ്ങിയ ഒരു അഡാർ ലവ് ലെ ഗാനത്തിനും ശേഷം ഇരുവരും ഒന്നിക്കുന്ന അരവിന്ദന്റെ അതിഥികളിലെ ഗാനം കഴിഞ്ഞ ദിവസം പുറത്തിറങ്ങിയിരുന്നു. ചിത്രം ഏപ്രിലിൽ തീയറ്ററുകളിൽ എത്തുന്നു.