ഇടതുപക്ഷ നേതാവായി ശ്രീനാഥ് ഭാസി; ‘പടച്ചോനേ ഇങ്ങള് കാത്തോളീ’ റിലീസ് ഡേറ്റ് എത്തി

യുവ താരം ശ്രീനാഥ് ഭാസി നായകനായി എത്തുന്ന ഏറ്റവും പുതിയ ചിത്രമായ പടച്ചോനേ ഇങ്ങള് കാത്തോളീയുടെ റിലീസ് ഡേറ്റ് എത്തി. ഈ വരുന്ന നവംബർ 24 നാണ് ഈ ചിത്രം പ്രേക്ഷകരുടെ മുന്നിലെത്തുക. ഇഷ്ഖ് എന്ന ചിത്രത്തിലൂടെ കയ്യടി നേടിയ ആൻ ശീതൾ നായികാ വേഷം ചെയ്യുന്ന ഈ ചിത്രം സംവിധാനം ചെയ്തിരിക്കുന്നത് ബിജിത് ബാലയാണ്. ഇടത് പക്ഷ നേതാവായ സഖാവ് ദിനേശനെന്ന കഥാപാത്രമായാണ് ശ്രീനാഥ് ഭാസി ഇതിൽ അഭിനയിച്ചിരിക്കുന്നത്. ടൈനി ഹാൻഡ്സ് പ്രൊഡക്ഷൻസിന്റെ ബാനറിൽ ജോസ്കുട്ടി മഠത്തിൽ, രഞ്ജിത്ത് മണംബ്രക്കാട്ട്‌ എന്നിവർ ചേർന്ന് നിർമ്മിക്കുന്ന ചിത്രത്തിന് തിരക്കഥ രചിച്ചിരിക്കുന്നത് പ്രദീപ് കുമാർ കാവുംതറയാണ്. ഈ ചിത്രത്തിൻറെ പോസ്റ്ററുകൾ, ഇതിന്റെ രസകരമായ ടീസറുകൾ എന്നിവയെല്ലാം വലിയ പ്രേക്ഷക ശ്രദ്ധ നേടിയിരുന്നു. കുറച്ചു ദിവസങ്ങൾക്ക് മുൻപ് റിലീസ് ചെയ്ത ഇതിന്റെ ട്രയ്ലറും സോഷ്യൽ മീഡിയയിൽ സൂപ്പർ ഹിറ്റായി മാറി.

ഗ്രാമീണ പശ്ചാത്തലത്തിൽ നർമ്മത്തിനൊപ്പം സംഗീതത്തിനും പ്രണയത്തിനും പ്രാധാന്യം നൽകി ഒരുക്കിയ ഈ ചിത്രത്തിൽ ഗ്രേസ്‌ ആൻ്റണി, രസ്ന പവിത്രൻ, അലെൻസിയർ, ജോണി ആന്റണി, മാമുക്കോയ, ഹരീഷ് കണാരൻ, ദിനേശ് പ്രഭാകർ, ശ്രുതി ലക്ഷ്മി, നിർമൽ പാലാഴി, വിജിലേഷ്, നിർമ്മാതാക്കളിൽ ഒരാളായ രഞ്ജിത്ത് മണമ്പ്രക്കാട്ട്, നാഥാനിയേൽ മഠത്തിൽ, ഉണ്ണി ചെറുവത്തൂർ, രഞ്ജിത്ത് കൺകോൽ എന്നിവരും നിർണ്ണായക വേഷങ്ങൾ ചെയ്തിരിക്കുന്നു. വിഷ്ണു പ്രസാദ് ക്യാമറ ചലിപ്പിക്കുകയും കിരൺ ദാസ് എഡിറ്റിംഗ് നിർവഹിക്കുകയും ചെയ്ത ഈ ചിത്രത്തിന് സംഗീതമൊരുക്കിയത് ഷാൻ റഹ്മാനാണ്. വിനീത് ശ്രീനിവാസൻ ആലപിച്ച ഇതിലേ ഒരു ഗാനവും പ്രേക്ഷക ശ്രദ്ധ നേടിയെടുത്തിട്ടുണ്ട്.