ശരിക്കും ഇത് വേദനാജനകം; ട്രൈലെർ ലോഞ്ച് ഷക്കീലയാണെന്നറിഞ്ഞ് പ്രോഗ്രാം ക്യാൻസൽ ചെയ്ത് മാൾ അധികൃതർ

ഒമർ ലുലു സംവിധാനം ചെയ്ത ഏറ്റവും പുതിയ ചിത്രമായ നല്ല സമയം റിലീസിന് ഒരുങ്ങുകയാണ്. ഈ ചിത്രത്തിന്റെ ട്രൈലെർ ലോഞ്ച് ഇന്ന് വൈകുന്നേരം ഏഴരക്ക് കോഴിക്കോടുള്ള ഒരു പ്രമുഖ മാളിൽ വെച്ച് നടത്തുമെന്നാണ് പ്രഖ്യാപിച്ചിരുന്നത്. പ്രശസ്ത നടി ഷക്കീലയാണ് ഈ ട്രൈലെർ ലോഞ്ച് അവിടെ വെച്ച് നടത്താനിരുന്നത്. എന്നാൽ അവസാന നിമിഷം ഈ ചടങ്ങ് മാൾ അധികൃതർ ക്യാൻസൽ ചെയ്യുകയായിരുന്നു. ഷക്കീലയാണ് ട്രൈലെർ ലോഞ്ച് ചടങ്ങിലെ മുഖ്യാതിഥി എന്നറിഞ്ഞാണ് മാൾ അധികൃതർ ഈ പരിപാടി ക്യാൻസൽ ചെയ്തത്. ആദ്യം കുറെ സുരക്ഷാ കാരണങ്ങൾ അവർ പറഞ്ഞെങ്കിലും, ഷക്കീല ഇല്ലെങ്കിൽ പരിപാടി നടത്താൻ അനുവദിക്കാമെന്ന് മാൾ അധികൃതർ അറിയിച്ചതായി സംവിധായകൻ ഒമർ ലുലുവും വെളിപ്പെടുത്തി. ഏതായാലും ഈ പ്രോഗ്രാമിന് വേണ്ടി മാത്രം എത്തിയ ഷക്കീലയെ ഒറ്റപ്പെടുത്തി, ഈ പരിപാടി നടത്തുന്നില്ല എന്ന് തീരുമാനിച്ചെന്നും ഒമർ ലുലു പറഞ്ഞു.

https://www.facebook.com/omarlulu/videos/2054362524749713/

കോഴിക്കോട് മാൾ അധികൃതരുടെ ഈ പെരുമാറ്റം തന്നെ ഏറെ വേദനിപ്പിച്ചു എന്നും, പക്ഷെ ഇത്തരത്തിലുള്ള അനുഭവങ്ങൾ മുൻപും നടന്നിട്ടുള്ളത് കൊണ്ട് അത് ശീലമായെന്നും ഷക്കീല പറയുന്നു. ഈ വിഷയത്തിൽ തന്റെ വിഷമം ഷെയർ ചെയ്തു കൊണ്ട് ഷക്കീല സോഷ്യൽ മീഡിയയിൽ പങ്ക് വെച്ച വീഡിയോ ഇപ്പോൾ വലിയ ശ്രദ്ധയാണ് നേടുന്നത്. സംവിധായകൻ ഒമർ ലുലുവും ഈ വീഡിയോയിൽ ഷക്കീലക്കൊപ്പമുണ്ട്. ഇർഷാദ് അലിയെ നായകനാക്കി ഒമർ ലുലു ഒരുക്കിയ നല്ല സമയം നവംബർ 25 നു റിലീസ് ചെയ്യും. A സർട്ടിഫിക്കറ്റ് ലഭിച്ചിരിക്കുന്ന ഈ ചിത്രം ഒരു ഫൺ ത്രില്ലർ ആയാണ് ഒരുക്കിയിരിക്കുന്നതെന്ന് അണിയറ പ്രവർത്തകർ പറയുന്നു.