വൈറ്റ് റൂം ടോർച്ചർ തിരഞ്ഞ് സോഷ്യൽ മീഡിയ; ലൂക്ക് ആന്റണിയായി റോഷാക്കിൽ മെഗാസ്റ്റാർ

മെഗാസ്റ്റാർ മമ്മൂട്ടി നായകനായി എത്തുന്ന ഏറ്റവും പുതിയ ചിത്രമായ റോഷാക്കിന്റെ പോസ്റ്ററുകളാണ് ഇപ്പോൾ സോഷ്യൽ മീഡിയയിൽ ചർച്ച ചെയ്യപ്പെടുന്നത്. ഒരു സൈക്കോളജിക്കൽ ത്രില്ലറായി ഒരുക്കിയിരിക്കുന്ന ഈ ചിത്രത്തിന്റെ ടൈറ്റിൽ തൊട്ട്, ഇതിലെ പോസ്റ്ററുകളിൽ കാണപ്പെടുന്ന കാര്യങ്ങൾ വരെ വളരെ വിശദമായി തന്നെയാണ് സിനിമ പ്രേമികൾ നിരീക്ഷിക്കുന്നത്. മുഴുവൻ വെളുത്ത നിറത്തിലുള്ള മുറിയിൽ വെളുത്ത വസ്ത്രവും ധരിച്ചിരിക്കുന്ന മമ്മൂട്ടിയുടെ ഒരു പോസ്റ്റർ പുറത്തു വന്നപ്പോൾ മുതൽ, വൈറ്റ് റൂം ടോർച്ചർ എന്ന ശിക്ഷാരീതിയെ കുറിച്ചുള്ള വിവരങ്ങൾ തിരയുകയാണ് സോഷ്യൽ മീഡിയ. ആക്ഷൻ, മിസ്റ്ററി, പ്രതികാരം എന്നിവയെല്ലാം നിറഞ്ഞ ഒരു ത്രില്ലറായാണ് ഈ ചിത്രം ഒരുക്കിയിരിക്കുന്നതെന്ന സൂചനയാണ് ഇതിന്റെ ട്രൈലെർ നമ്മുക്ക് നൽകിയത്. ഏതായാലും മലയാള സിനിമ പ്രേമികൾ ഇതുവരെ കാണാത്ത ഒരു സിനിമാനുഭവമായിരിക്കും ഈ ചിത്രം സമ്മാനിക്കുക എന്നാണ് പ്രതീക്ഷിക്കപ്പെടുന്നത്.

ആസിഫ് അലിയെ നായകനാക്കി കെട്ട്യോളാണെന്റെ മാലാഖ എന്ന സൂപ്പർ ഹിറ്റ് ചിത്രം സംവിധാനം ചെയ്തു കൊണ്ടരങ്ങേറ്റം കുറിച്ച നിസാം ബഷീറാണ് ഈ മമ്മൂട്ടി ചിത്രം സംവിധാനം ചെയ്തിരിക്കുന്നത്. താൻ പുതുതായി ആരംഭിച്ച മമ്മൂട്ടി കമ്പനി എന്ന സിനിമാ നിർമ്മാണ ബാനറിൽ മമ്മൂട്ടി തന്നെ നിർമ്മിക്കുന്ന രണ്ടാമത്തെ ചിത്രവുമാണിത്. ലിജോ ജോസ് പെല്ലിശ്ശേരി ഒരുക്കിയ നൻ പകൽ നേരത്ത് മയക്കമാണ് ഈ ബാനറിൽ മമ്മൂട്ടി നിർമ്മിച്ച ആദ്യത്തെ ചിത്രം. അഡ്‌വെഞ്ചേർസ് ഓഫ് ഓമനക്കുട്ടൻ, ഇബിലീസ് എന്നീ ആസിഫ് അലി ചിത്രങ്ങൾ രചിച്ച സമീർ അബ്ദുൾ തിരക്കഥ രചിച്ച റോഷാക്ക് പൂജ റിലീസായി സെപ്റ്റംബർ ഇരുപത്തിയൊന്പതിന്‌ റിലീസ് ചെയ്യും. ദുൽഖർ സൽമാന്റെ വേഫെറർ ഫിലിംസ് ഇവിടെ വിതരണം ചെയ്യുന്ന ഈ ചിത്രത്തിന് സംഗീതമൊരുക്കിയത് മിഥുൻ മുകുന്ദൻ, ക്യാമറ ചലിപ്പിച്ചത് നിമിഷ് രവി, എഡിറ്റിംഗ് നിർവഹിച്ചത് കിരൺ ദാസ് എന്നിവരാണ്. ഷറഫുദ്ധീൻ, ജഗദീഷ്, ഗ്രേസ് ആന്റണി, ബിന്ദു പണിക്കർ, സഞ്ജു ശിവറാം, കോട്ടയം നസീർ എന്നിവരും ഇതിൽ പ്രധാന വേഷങ്ങൾ ചെയ്തിട്ടുണ്ട്.