ശിവകാർത്തികേയന്റെ ബ്ലോക്ക്ബസ്റ്റർ ഡോൺ ഇനി ഒടിടിയിലും; റിലീസ് ഡേറ്റ് എത്തി

തമിഴിലെ യുവ സൂപ്പർ താരമായ ശിവകാർത്തികേയൻ നായകനായെത്തിയ ഏറ്റവും പുതിയ ചിത്രമാണ് ഡോൺ. കഴിഞ്ഞ മാസം രണ്ടാം വാരം റിലീസ് ചെയ്ത ഈ ചിത്രം ബ്ലോക്ക്ബസ്റ്റർ വിജയമാണ് നേടിയത്. ശിവകാർത്തികേയന്റെ കരിയറിലെ തന്നെ ഏറ്റവും വലിയ വിജയമായി മാറിയ ഡോൺ ഇപ്പോൾ ഒടിടി റിലീസിനും തയ്യാറെടുക്കുകയാണ്. വരുന്ന ജൂൺ പത്തു മുതൽ നെറ്റ്ഫ്ലിക്സിലാണ് ഈ ചിത്രം സ്ട്രീം ചെയ്യാൻ പോകുന്നത്. ഒരു പക്കാ ക്യാമ്പസ് ഫൺ ഫിലിമായി ഒരുക്കിയ ഡോൺ നൂറു കോടി ക്ലബിലും ഇടം പിടിച്ച തമിഴ് ചിത്രമാണ്. സിബി ചക്രവർത്തി എഴുതി സംവിധാനം ചെയ്തിരിക്കുന്ന ഈ ചിത്രം നിർമ്മിച്ചിരിക്കുന്നത് ശിവകാർത്തികേയൻ പ്രൊഡക്ഷൻസ്, ലൈക്ക പ്രൊഡക്ഷൻസ് എന്നിവർ ചേർന്നാണ്. കോമഡി, റൊമാൻസ്, ആക്ഷൻ, വൈകാരിക മുഹൂർത്തങ്ങളെന്നിവ കൃത്യമായ അളവിൽ ചേർത്തൊരുക്കിയ ഈ ചിത്രം യുവ പ്രേക്ഷകരെ വലിയ രീതിയിലാണ് രസിപ്പിച്ചത്. സ്കൂൾ ലൈഫും കോളേജ് ലൈഫുമെല്ലാം ഏറെ രസകരമായാണ് ഇതിലവതരിപ്പിച്ചിരിക്കുന്നത്.

ഈ ചിത്രം നേടിയ വമ്പൻ വിജയത്തോടെ തമിഴിലെ പുതുതലമുറയിലെ ഏറ്റവും താരമൂല്യമുള്ള നായകനായി ശിവകാർത്തികേയൻ മാറിക്കഴിഞ്ഞു. ചക്രവർത്തി എന്ന നായക കഥാപാത്രമായി ശിവകാർത്തികേയൻ, പ്രൊഫസർ ഭൂമിനാഥനായി എസ് ജെ സൂര്യ. ചക്രവർത്തിയുടെ അച്ഛൻ കഥാപാത്രമായി സമുദ്രക്കനി എന്നിവർ കാഴ്ച്ചവെച്ച പ്രകടനമാണ് ഈ ചിത്രത്തിന്റെ ഹൈലൈറ്റുകൾ. പ്രിയങ്ക മോഹൻ നായികാ വേഷം ചെയ്തിരിക്കുന്ന ഈ ചിത്രത്തിൽ സൂരി, കാളി വെങ്കട്, ബാല ശരവണൻ, രാധ രവി, മുനിഷ്‌കാന്ത്‌, സിവാങ്കി, മനോബാല എന്നിവരും അഭിനയിച്ചിട്ടുണ്ട്. അനിരുദ്ധ് രവിചന്ദർ സംഗതം നൽകിയ ഇതിലെ ഗാനങ്ങളും വലിയ രീതിയിൽ വൈറലായി മാറിയിരുന്നു.