അന്ന് അച്ഛനു വേണ്ടി, ഇന്ന് മകനു വേണ്ടി; ചിത്രീകരണത്തിനായി ബസിൽ കയറിയ അനുഭവം പങ്കുവെച്ച് ശോഭന

പ്രശസ്ത സംവിധായകൻ സത്യൻ അന്തിക്കാടിന്റെ മകൻ അനൂപ് സത്യൻ ആദ്യമായി ഒരുക്കുന്ന സിനിമയുടെ ഷൂട്ടിംഗ് പുരോഗമിക്കുകയാണ്. സുരേഷ് ഗോപി, ശോഭന, ദുൽഖർ സൽമാൻ, കല്യാണി പ്രിയദർശൻ എന്നിവർ പ്രധാന വേഷങ്ങൾ ചെയ്യുന്ന ഈ ഫാമിലി ഡ്രാമ നിർമ്മിക്കുന്നതും ദുൽഖർ സൽമാൻ തന്നെയാണ്. ഈ ചിത്രത്തിലെ ശോഭനയുടേയും സുരേഷ് ഗോപിയുടെയും, ദുൽഖറിന്റെയുമെല്ലാം സ്റ്റില്ലുകൾ സോഷ്യൽ മീഡിയയിൽ ഏറെ ശ്രദ്ധ നേടിയിരുന്നു. ഇപ്പോഴിതാ ഈ ചിത്രത്തിൽ നിന്ന് ശോഭന പങ്കു വെച്ച ഒരു സ്റ്റിൽ കൂടി ഏവരുടെയും ശ്രദ്ധ പിടിച്ചു പറ്റുകയാണ്. ശോഭനയും സുരേഷ് ഗോപിയും അനൂപ് സത്യനും കൂടി ഒരു ബസിൽ ഇരിക്കുന്ന ചിത്രമാണ് ശോഭന പങ്കു വെച്ചത്.

താൻ അവസാനമായി ബസിൽ കയറിയത് അനൂപിന്റെ അച്ഛൻ സത്യൻ അന്തിക്കാട് സംവിധാനം ചെയ്ത ഒരു ചിത്രത്തിൽ ആണെന്നും അതിനു ശേഷം ഇപ്പോഴാണ് ബസിൽ കയറുന്നതു എന്നും ശോഭന ചിത്രത്തിന് ക്യാപ്‌ഷൻ ആയി കൊടുത്തിട്ടുണ്ട്. ഏറെ കാലത്തിനു ശേഷമാണു ശോഭന മലയാള സിനിമയിൽ അഭിനയിക്കുന്നത്. ചിത്രത്തിലെ നായകനായ സുരേഷ് ഗോപിയും കുറെ നാളുകൾക്കു ശേഷമാണു അഭിനയ രംഗത്തേക്ക് തിരിച്ചെത്തുന്നത്. പ്രിയദർശന്റെ മകൾ കല്യാണി പ്രിയദർശൻ ആദ്യമായി മലയാളത്തിൽ നായികാ വേഷം ചെയ്യുന്ന ചിത്രം കൂടിയാണ് ഇത്. അടുത്ത വർഷം ഏപ്രിൽ മാസത്തിൽ ഈ ചിത്രം റിലീസ് ചെയ്യാൻ ആണ് അണിയറ പ്രവർത്തകരുടെ പ്ലാൻ എന്നറിയുന്നു. അനൂപ് സത്യൻ തന്നെയാണ് ഈ ചിത്രത്തിന്റെ രചനയും നിർവഹിച്ചിരിക്കുന്നത്. സത്യൻ അന്തിക്കാടിന്റെ മറ്റൊരു മകൻ ആയ അഖിൽ സത്യനും സംവിധായകൻ ആവുകയാണ്. ഫഹദ് ഫാസിൽ ആണ് ആ ചിത്രത്തിലെ നായകൻ എന്നാണ് വിവരം.