മോഹൻലാലുമൊത്തു വീണ്ടുമെത്തുമോ; ആരാധകരുടെ ചോദ്യത്തിന് മറുപടി നൽകി ശോഭന..!

മലയാള സിനിമയിലെ ഏറ്റവും മികച്ച നടിമാരിലൊളായ ശോഭന ഒരിടവേളക്ക് ശേഷം സിനിമയിലേക്ക് മടങ്ങി വന്ന ചിത്രമായിരുന്നു ദുൽഖർ സൽമാൻ നിർമ്മിച്ച് അനൂപ് സത്യൻ സംവിധാനം ചെയ്ത വരനെ ആവശ്യമുണ്ട്. ഈ വർഷം റിലീസ് ചെയ്ത സൂപ്പർ ഹിറ്റായ ഈ ചിത്രത്തിൽ സുരേഷ് ഗോപിയുടെ നായികയായി ആണ് ശോഭന അഭിനയിച്ചത്. സുരേഷ് ഗോപി, ജയറാം, മമ്മൂട്ടി എന്നീ സൂപ്പർ താരങ്ങൾക്കൊപ്പമൊക്കെ ശോഭന ഒരുപാട് ചിത്രങ്ങളിൽ നായികാ വേഷം ചെയ്തിട്ടുണ്ടെങ്കിലും പ്രേക്ഷകർ ഏറ്റവും കൂടുതൽ ആഘോഷിച്ചതും ഇഷ്ടപ്പെടുന്നതും മോഹൻലാൽ- ശോഭന ജോഡിയെ സ്‌ക്രീനിൽ കാണാനാണ്. ഏറ്റവും കൂടുതൽ തവണ ശോഭനയുടെ നായകനായ സൂപ്പർ താരമാണ് മോഹൻലാൽ. ഇരുവരും ഒരുമിച്ചു അഭിനയിച്ച ചിത്രങ്ങളിൽ തൊണ്ണൂറു ശതമാനവും സൂപ്പർ ഹിറ്റുകളാണ് എന്ന് മാത്രമല്ല ഇന്നും പ്രേക്ഷകർ നെഞ്ചോടു ചേർക്കുന്ന ചിത്രങ്ങളാണ് അവയെല്ലാം. കഴിഞ്ഞ ദിവസം ഫേസ്ബുക് ലൈവിൽ വന്ന ശോഭനയോടു പ്രേക്ഷകർ ഏറ്റവും കൂടുതൽ ചോദിച്ചതും മോഹൻലാലിനൊപ്പം ഒരു ചിത്രം ഇനി വരുമോ എന്നാണ്.

ശോഭന അതിനു മറുപടി വരുന്നത് തീർച്ചയായും വരുമെന്നാണ്. അവസരം ലഭിച്ചാൽ തീർച്ചയായും ചെയ്യുമെന്നും, താൻ റെഡി ആണെന്നും അങ്ങനെ ഒരു ചിത്രം സംഭവിക്കട്ടെ എന്നും ശോഭന പറയുന്നു. മോഹൻലാൽ തന്റെ അടുത്ത സുഹൃത്താണെന്നും താൻ ലാലിനെ വിളിച്ചു പ്രേക്ഷകരുടെ ഈ ആഗ്രഹത്തെ കുറിച്ച് പറയാമെന്നും ശോഭന പറയുന്നു. മമ്മുക്കയെയും താൻ വിളിക്കാമെന്നും അദ്ദേഹത്തോടൊപ്പവും ഇനിയും അഭിനയിക്കാൻ സാധിക്കട്ടെ എന്നും ശോഭന പറഞ്ഞു. അവിടുത്തെ പോലെ ഇവിടെയും, വസന്ത സേന, അഴിയാത്ത ബന്ധങ്ങൾ, അനുബന്ധം, രംഗം, ടി പി ബാലഗോപാലൻ എം എ, കുഞ്ഞാറ്റകിളികൾ, ഇനിയും കുരുക്ഷേത്രം, എന്റെ എന്റേത് മാത്രം, അഭയം തേടി, പടയണി, നാടോടിക്കാറ്റ്, വെള്ളാനകളുടെ നാട്, ആര്യൻ, വാസ്തുഹാര, ഉള്ളടക്കം, മായാമയൂരം, മണിച്ചിത്രത്താഴ്, പവിത്രം, തേന്മാവിൻ കൊമ്പത്തു, പക്ഷെ, മിന്നാരം, ശ്രദ്ധ, മാമ്പഴക്കാലം, സാഗർ ഏലിയാസ് ജാക്കി എന്നീ ചിത്രങ്ങളിലാണ് മോഹൻലാൽ- ശോഭന ടീം ഒന്നിച്ചഭിനയിച്ചതു.