പൊലീസ് വേഷത്തിൽ തോക്കുമായി നിൽക്കുന്ന ഷൈൻ ടോം ചാക്കോ; ‘ക്രിസ്റ്റഫർ’ലെ ഷൈൻ ടോം ചാക്കോയുടെ ക്യാരക്ടർ പോസ്റ്റർ പുറത്ത്

മെഗാസ്റ്റാർ മമ്മൂട്ടിയെ നായകനാക്കി ബി ഉണ്ണികൃഷ്ണൻ സംവിധാനം ചെയ്ത ‘ക്രിസ്റ്റഫർ’ലെ ഷൈൻ ടോം ചാക്കോയുടെ ക്യാരക്ടർ പോസ്റ്റർ പുറത്തുവിട്ടു. ‘ജോർജ്’ എന്ന പൊലീസ് ഓഫീസറെയാണ് ഷൈൻ ടോം ചിത്രത്തിൽ അവതരിപ്പിച്ചിരിക്കുന്നത്. പൊലീസ് വേഷത്തിൽ തോക്കുമായി നിൽക്കുന്ന ഷൈൻ ടോം ചാക്കോയെ പോസ്റ്ററിൽ കാണാം. ‘ബയോഗ്രഫി ഓഫ് എ വിജിലന്റ് കോപ്പ്’ എന്ന ടാ​ഗ് ലൈനോടെ പുറത്തിറങ്ങുന്ന ചിത്രം ആർ.ഡി ഇല്യൂമിനേഷൻസാണ് നിർമ്മിച്ചിരിക്കുന്നത്.

മോഹൻലാൽ ചിത്രം ‘ആറാട്ട്’ന് ശേഷം ഉദയകൃഷ്ണയുടെ തിരക്കഥയിൽ ബി ഉണ്ണികൃഷ്ണൻ സംവിധാനം ചെയ്ത ചിത്രമാണ് ‘ക്രിസ്റ്റഫർ’. സ്നേഹ, അമല പോൾ, ഐശ്വര്യ ലക്ഷ്മി എന്നിങ്ങനെ മൂന്ന് നായികമാരാണ് ചിത്രത്തിലുള്ളത്. തെന്നിന്ത്യൻ താരം വിനയ് റായിയും ചിത്രത്തിൽ പ്രധാന വേഷത്തിലെത്തുന്നുണ്ട്. ദിലീഷ് പോത്തൻ, സിദ്ദിഖ്, ജിനു എബ്രഹാം, വിനീത കോശി, വാസന്തി എന്നിവരാണ് മറ്റ് താരങ്ങൾ. മുപ്പത്തിയഞ്ചോളം പുതുമുഖങ്ങളും ചിത്രത്തിലുണ്ട്. പൊലീസ് ഉദ്യോഗസ്ഥനായാണ് മമ്മൂട്ടി പ്രത്യക്ഷപ്പെടുന്നത്. ചിത്രം ഇൻവെസ്റ്റിഗേഷൻ ത്രില്ലറാണ് എന്നാണ് അറിയാൻ കഴിഞ്ഞത്.

ഫൈസ് സിദ്ദിഖ് ഛായാഗ്രഹണം നിർവ്വഹിച്ച ചിത്രത്തിന്റെ ചിത്രസംയോജനം മനോജാണ് കൈകാര്യം ചെയ്തിരിക്കുന്നത്. ജസ്റ്റിൻ വർഗീസിന്റെതാണ് സംഗീതം. എറണാകുളം, പൂയംകുട്ടി, വണ്ടിപ്പെരിയാർ എന്നിവിടങ്ങളിലായിരുന്നു ചിത്രത്തിന്റെ ചിത്രീകരണം. അടുത്ത ജനുവരിയിൽ ചിത്രം റിലീസ് ചെയ്യാനാണ് അണിയറ പ്രവർത്തകർ തീരുമാനിച്ചിരിക്കുന്നത്. നിസാം ബഷീർ സംവിധാനം ചെയ്ത ‘റോഷാക്ക്’ന് ശേഷം പുറത്തിറങ്ങുന്ന മമ്മുട്ടിയുടെ അടുത്ത ത്രില്ലർ ചിത്രമായിക്കും ‘ക്രിസ്റ്റഫർ’. മമ്മൂട്ടി കമ്പനിയുടെ ബാനറിലാണ് ‘റോഷാക്ക്’ നിർമ്മിച്ചത്.