വീണ്ടും വിസ്മയിപ്പിക്കാൻ ഷൈൻ ടോം ചാക്കോയുടെ ആംബ്രോസ്; പുതിയ ചിത്രത്തിലെ ലുക്ക് ഏറ്റെടുത്തു പ്രേക്ഷകർ..!

അടുത്തിടെ വ്യത്യസ്തവും ശ്കതവുമായ കഥാപാത്രങ്ങളുമായി എത്തി പ്രേക്ഷകരെ ഞെട്ടിച്ച മലയാള നടന്മാരിൽ ഒരാളാണ് ഷൈൻ ടോം ചാക്കോ. ഇപ്പോൾ മലയാളത്തിലെ ഏറ്റവും തിരക്കുള്ള നടന്മാരിൽ ഒരാൾ കൂടിയാണ് ഷൈൻ ടോം ചാക്കോ. നായകനായും വില്ലനായും സഹനടനായുമെല്ലാം ഒട്ടേറെ പ്രതീക്ഷയുള്ള ചിത്രങ്ങളാണ് ഷൈൻ ടോം ചാക്കോ അഭിനയിച്ചു ഇനി പുറത്തു വരാനുള്ളത്. ഇപ്പോഴിതാ, താൻ അഭിനയിക്കുന്ന അടിത്തട്ട് എന്ന ചിത്രത്തിന്റെ തന്റെ കഥാപാത്രത്തിന്റെ പോസ്റ്റർ പുറത്തു വിട്ടിരിക്കുകയാണ് അദ്ദേഹം. ആംബ്രോസ് എന്ന് പേരുള്ള ഈ കഥാപാത്രത്തിന്റെ ലുക്ക് ഇപ്പോൾ സോഷ്യൽ മീഡിയയിൽ വൈറലായി കഴിഞ്ഞു. വീണ്ടും ഈ നടൻ ഞെട്ടിക്കാൻ സാധ്യതയുള്ള ഒരു കഥാപാത്രമാകും ആംബ്രോസ് എന്ന പ്രതീക്ഷയാണ് ഈ പോസ്റ്റർ പ്രേക്ഷകർക്ക് നൽകുന്നത്. സണ്ണി വെയ്ൻ നായകനായി എത്തുന്ന ഈ ചിത്രം സംവിധാനം ചെയ്തിരിക്കുന്നത് ജിജോ ആന്റണി ആണ്.

സൂസൻ ജോസഫും സിൻട്രീസ്സയും ചേർന്ന് മിഡിൽ മാർച്ച് സ്റ്റുഡിയോസ്, കാനായിൽ ഫിലിംസ് എന്നീ ബാനറുകളിലാണ് ഈ ചിത്രം നിർമ്മിച്ചിരിക്കുന്നത്. പൂർണ്ണമായും നടുക്കടലിൽ ചിത്രീകരിച്ച സിനിമയെന്ന പ്രത്യേകതയും ഈ ചിത്രത്തിനുണ്ട്. ഡാർവിന്റെ പരിണാമം, കൊന്തയും പൂണൂലും, പോക്കിരിസൈമൺ എന്നീ ചിത്രങ്ങൾക്കു ശേഷം ജിജോ ആന്റണി സംവിധാനം ചെയ്ത ചിത്രമാണ് ഇത്. ഇത് കൂടാതെ ദുൽഖർ സൽമാൻ നിർമ്മിച്ച് പ്രശോഭ്‌ വിജയൻ ഒരുക്കിയ അടി എന്ന ചിത്രത്തിലെ നായക വേഷം ചെയ്യുന്നതും ഷൈൻ ടോം ചാക്കോ ആണ്. ഇവ കൂടാതെ മമ്മൂട്ടി ചിത്രം ഭീഷ്മ പർവ്വം, ദുൽഖർ ചിത്രം കുറുപ്പ്, ദളപതി വിജയ് ചിത്രം ബീസ്റ്റ് എന്നിവയും ഷൈൻ ടോം ചാക്കോ അഭിനയിച്ചു പുറത്തു വരാനുള്ള ചിത്രങ്ങളാണ്. താമി, റോയ്, വെള്ളേപ്പം, പട, ജിന്ന് എന്നിവയാണ് ഷൈൻ ടോം ചാക്കോയുടെ ഇനി വരാനുള്ള മറ്റു മലയാള ചിത്രങ്ങൾ.