മീശ മാധവനെ പോലെ ഒരു കമ്പ്ലീറ്റ് എന്റെർറ്റൈനെർ ആയിരിക്കും ശിക്കാരി ശംഭു എന്ന് സുഗീത്..!

കുഞ്ചാക്കോ ബോബനെ നായകനാക്കി സുഗീത് ഒരുക്കിയ ശിക്കാരി ശംഭു എന്ന ചിത്രം ഈ ആഴ്ച റിലീസ് ചെയ്യാൻ ഒരുങ്ങുകയാണ്. ഏയ്ഞ്ചൽ മരിയ സിനിമയുടെ ബാനറിൽ എസ് കെ ലോറെൻസ് നിർമ്മിച്ചിരിക്കുന്ന ഈ ചിത്രം രചിച്ചിരിക്കുന്നത് നിഷാദ് കോയ ആണ്. മീശ മാധവൻ ദിലീപിന്റെ കരിയറിൽ ഒരു വഴി തിരിവ് ആയതുപോലെ ഒരു കമ്പ്ലീറ്റ് എന്റെർറ്റൈനെർ ആയി ഒരുക്കിയിരിക്കുന്ന ശിക്കാരി ശംഭു കുഞ്ചാക്കോ ബോബന്റെ കരിയറിൽ ഒരു വഴിത്തിരിവ് ആകുമെന്ന് വിശ്വസിക്കുന്നതായി സുഗീത് പറയുന്നു. ഓർഡിനറി , മധുര നാരങ്ങാ എന്നീ രണ്ടു സൂപ്പർ വിജയങ്ങൾ കുഞ്ചാക്കോ ബോബന് നൽകിയ സംവിധായകൻ ആണ് സുഗീത്. കുരുതിമലക്കാവ് എന്ന മലയോര ഗ്രാമത്തിൽ നടക്കുന്ന കഥയാണ് ഈ ചിത്രം പറയുന്നത്. ഈ ഗ്രാമത്തിൽ പുലിവേട്ടക്കാരൻ ആയി എത്തുന്ന പീലി എന്ന കഥാപാത്രം ആയാണ് കുഞ്ചാക്കോ ബോബൻ എത്തുന്നത്.

കോമെഡിയും ആവേശവും നിറഞ്ഞ ഈ ചിത്രത്തിൽ മാസ്സ് ഗെറ്റപ്പിൽ ആണ് കുഞ്ചാക്കോ ബോബൻ എത്തുന്നത്. മാസ്സും കോമെഡിയും ത്രില്ലും നിറച്ചു കഥ പറഞ്ഞിരിക്കുന്ന ഈ ചിത്രം എല്ലാത്തരം പ്രേക്ഷകരെയും ഒരുപോലെ ആകർഷിക്കുമെന്നാണ് അണിയറ പ്രവർത്തകരുടെ വിശ്വാസം. കുഞ്ചാക്കോ ബോബന് ഒപ്പം വിഷ്ണു ഉണ്ണികൃഷ്ണനും ഹാരിഷ് കണാരനും പ്രധാന വേഷങ്ങളിൽ എത്തിയിരിക്കുന്ന ഈ ചിത്രത്തിൽ നായിക ആയെത്തിയിരിക്കുന്നതു ശിവദയാണ്. അൽഫോൻസായും ഈ ചിത്രത്തിൽ നായികാ തുല്യമായ വേഷം ചെയ്തിരിക്കുന്നു. ഇവരെ കൂടാതെ സലിം കുമാർ, കൃഷ്ണ കുമാർ, സംവിധായകൻ ജോണി ആന്റണി, സംവിധായകൻ അജി ജോൺ, മണിയൻ പിള്ളൈ രാജു എന്നിവരും ഈ ചിത്രത്തിന്റെ താര നിരയുടെ ഭാഗമാണ്.

ശ്രീജിത്ത് ഇടവന സംഗീതം പകർന്ന ചിത്രത്തിന് ദൃശ്യങ്ങൾ ഒരുക്കിയത് ഫൈസൽ അലിയും എഡിറ്റിംഗ് നിർവഹിച്ചത് വി സാജനുമാണ്. ശിക്കാരി ശംഭുവിന്റെ ട്രെയ്‌ലറും അതുപോലെ ഈ ചിത്രത്തിലെ ഗാനങ്ങളും ഇപ്പോഴേ പ്രേക്ഷക ശ്രദ്ധ നേടിയെടുത്തു കഴിഞ്ഞു. ഏതായാലും ചിരിയുടെയും ആവേശത്തിന്റെയും ഒരുത്സവം തന്നെയാണ് ശിക്കാരി ശംഭു പ്രേക്ഷകർക്കായി ഒരുക്കിയിരിക്കുന്നതെന്നാണ് സൂചനകൾ പറയുന്നത്.