ഹാരിഷ് കണാരൻ വീണ്ടും; ഷെർലക് ടോംസ് ഒരുക്കിയ ചിരിപ്പൂരത്തിൽ ഹാരിഷിന്റെ മിന്നുന്ന പ്രകടനം..!

ബിജു മേനോൻ നായകനായ ഷെർലക് ടോംസ് എന്ന ഷാഫി ചിത്രം കഴിഞ്ഞ ദിവസം ആണ് കേരളത്തിൽ പ്രദർശനം ആരംഭിച്ചത്. സച്ചി, ഷാഫി, നജിം കോയ എന്നിവർ ചേർന്ന് തിരക്കഥയും സംഭാഷണങ്ങളും തയ്യാറാക്കിയ ഈ ചിത്രം നിർമ്മിച്ചത് ഗ്ലോബൽ യുണൈറ്റഡ് മീഡിയ ആണ്. ബിജു മേനോന് പുറമെ ശ്രിന്ദ, മിയ, കോട്ടയം നസീർ , ഹാരിഷ് കണാരൻ, സുരേഷ് കൃഷ്ണ, സലിം കുമാർ, വിജയ രാഘവൻ, കലാഭവൻ ഷാജോൺ, നോബി, , റാഫി, ദിനേശ് ഓണിക്കർ, മോളി കണ്ണമാലി എന്നിവരും ഈ ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നു. ഇതിൽ ഏറ്റവും കൂടുതൽ കയ്യടി നേടിയ ഒരു കഥാപാത്രം ആണ് പോലീസ് ഹെഡ് കോൺസ്റ്റബിൾ ആയി എത്തിയ ഹാരിഷ് കണാരന്റെ കഥാപാത്രം .

ഫക്രുദീൻ എന്ന് പേരുള്ള ഹാരിഷിന്റെ കഥാപാത്രം ആണ് ഈ ചിത്രത്തിലെ കോമെഡിയുടെ ഏറിയ പങ്കും കൈകാര്യം ചെയ്യുന്നതെന്ന് പറഞ്ഞാൽ അതൊട്ടും അതിശയോക്തി ആവില്ല. കാരണം, ചിത്രം തുടങ്ങുമ്പോൾ തൊട്ടു അവസാനിക്കുമ്പോൾ വരെ ഹാരിഷ് പറയുന്ന നമ്പറുകൾ പ്രേക്ഷകരെ പൊട്ടിചിരിയിലാഴ്ത്തി.

കോട്ടയം നസീർ അവതരിപ്പിച്ച പോലീസ് ഇൻസ്പെക്ടറും ആയുള്ള ഹാരിഷിന്റെ കോമ്പിനേഷൻ സീനുകൾ ഈ ചിത്രത്തിന്റെ വിജയത്തിൽ ഏറെ നിർണ്ണായകം ആയിട്ടുണ്ട് എന്ന് തന്നെ പറയണം. തന്റെ സ്വതസിദ്ധമായ ശൈലിയിൽ ഹാരിഷ് പറയുന്ന ഡയലോഗുകളും അതിനു കൊടുക്കുന്ന രസകരമായ ശരീര ഭാഷയും ഏറെ രസകരമാണ് എന്ന് മാത്രമല്ല ഓരോ പ്രേക്ഷകരും അതൊരുപാട് ഇഷ്ട്ടപെട്ടു പോകുന്ന താരത്തിലുമാണ് ഈ കലാകാരൻ അത് അവതരിപ്പിക്കുന്നത്.

ബിജു മേനോന്റെ കരിയറിലെ തന്നെ ഏറ്റവും വലിയ ഓപ്പണിങ് ആണ് ഈ ചിത്രം നേടിയത്. മികച്ച പ്രേക്ഷക പ്രതികരണം ഇതിനോടകം നേടിയ ഈ ചിത്രം ബോക്സ് ഓഫീസിലും വമ്പൻ മുന്നേറ്റം വരും ദിവസങ്ങളിൽ കാഴ്ച വെക്കും എന്ന് പ്രതീക്ഷിക്കാം