ഹിറ്റ് മേക്കർ ഷാഫിയുടെ പുതിയ ചിത്രത്തിനായി പൃഥ്വിരാജ് ;ചിൽഡ്രൻസ് പാർക്ക് ട്രെയ്‌ലർ നാളെ…

മലയാളത്തിലെ സൂപ്പർ ഹിറ്റ് സംവിധായകരിൽ ഒരാളായ ഷാഫി മറ്റൊരു സൂപ്പർ ഹിറ്റ്‌ കൂടി നമ്മുക്ക് നൽകാനായി തന്റെ പുതിയ ചിത്രവുമായി എത്തുകയാണ്. ചിൽഡ്രൻസ് പാർക്ക് എന്ന് പേരിട്ടിരിക്കുന്ന ഈ ചിത്രത്തിന്റെ ട്രെയ്‌ലർ നാളെ യുവ സൂപ്പർ താരം പൃഥ്വിരാജ് സുകുമാരൻ ആണ് തന്റെ ഒഫീഷ്യൽ ഫേസ്ബുക് പേജ് വഴി റിലീസ് ചെയ്യാൻ പോകുന്നത്. വൺ മാൻ ഷോ, പുലിവാൽ കല്യാണം, കല്യാണ രാമൻ, തൊമ്മനും മക്കളും, മായാവി, ചോക്കലേറ്റ്, ചട്ടമ്പി നാട്, മേരിക്കുണ്ടൊരു കുഞ്ഞാട് , മേക് അപ്പ് മാൻ , ടൂ കൺഡ്രീസ് തുടങ്ങിയ എവർഗ്രീൻ സൂപ്പർ ഹിറ്റ് ചിത്രങ്ങൾ നമ്മുക്ക് നൽകിയ ഷാഫിയുടെ തൊട്ടു മുൻപത്തെ റിലീസും ഹിറ്റായിരുന്നു. നവാഗതനായ ബിബിൻ ജോർജ് നായകനായി എത്തിയ ഒരു പഴയ ബോംബ് കഥ എന്ന ചിത്രമായിരുന്നു അത്.

പുതിയ ചിത്രമായ ചിൽഡ്രൻസ് പാർക്കിലും പുതു തലമുറയിലെ പ്രതിഭകളെ തന്നെയാണ് ഷാഫി കേന്ദ്ര കഥാപാത്രങ്ങളെ ഏൽപ്പിച്ചിരിക്കുന്നത്. വിഷ്ണു ഉണ്ണികൃഷ്ണൻ, ഷറഫുദീൻ, ധ്രുവൻ , ഗായത്രി സുരേഷ്, മാനസ രാധാകൃഷ്ണന്‍, സൗമ്യ മേനോൻ എന്നിവർ പ്രധാന വേഷങ്ങൾ ചെയ്തിരിക്കുന്ന ഈ ചിത്രം കൊച്ചിൻ ഫിലിമ്സിന്റെ ബാനറിൽ രൂപേഷ് ഓമനയും മിലന്‍ ജലീലും ചേര്‍ന്നാണ് നിർമ്മിച്ചിരിക്കുന്നത്. ഫൈസൽ അലി ആണ് ഈ ചിത്രത്തിന് വേണ്ടി ദൃശ്യങ്ങൾ ഒരുക്കിയിരിക്കുന്നത്. ഷാഫിയുടെ സഹോദരനും പ്രശസ്ത സംവിധായകനും രചയിതാവും നടനുമായ റാഫി തിരക്കഥ ഒരുക്കിയ ഈ ചിത്രം അധികം വൈകാതെ തന്നെ തീയേറ്ററുകളിൽ എത്തും എന്നാണ് സൂചന.