നിശ്ചയത്തിന് ശേഷം ഇനി കല്യാണം; ദേശീയ പുരസ്‍കാരം നേടിയ തിങ്കളാഴ്ച നിശ്ചയത്തിന് രണ്ടാംഭാഗം

സംസ്ഥാന പുരസ്‍കാരങ്ങളും ദേശീയ പുരസ്കാരവും നേടി വലിയ ശ്രദ്ധ പിടിച്ചു പറ്റിയ മലയാള ചിത്രമാണ് തിങ്കളാഴ്ച നിശ്ചയം. നേരിട്ടുള്ള ഒടിടി റിലീസായി കഴിഞ്ഞ വർഷം സോണി ലൈവിൽ എത്തിയ ഈ ചിത്രം വമ്പൻ പ്രേക്ഷക- നിരൂപക പ്രശംസയാണ് നേടിയെടുത്തത്. ഹാസ്യത്തിൽ ചലിച്ചു കഥ പറഞ്ഞ ഈ ചിത്രം ഇന്ത്യ മുഴുവൻ ശ്രദ്ധ നേടിയെടുത്തു. സെന്ന ഹെഗ്‌ഡെ സംവിധാനം ചെയ്ത ഈ ചിത്രത്തിന് മികച്ച മലയാള ചിത്രത്തിനുള്ള ദേശീയ പുരസ്‍കാരമാണ് ലഭിച്ചത്. ഇപ്പോഴിതാ, ഈ ചിത്രത്തിന് ഒരു രണ്ടാം ഭാഗം ഉണ്ടാവുമെന്ന് വെളിപ്പെടുത്തിയിരിക്കുകയാണ് സംവിധായകൻ. സിനിമ എക്‌സ്പ്രസിന് നല്‍കിയ അഭിമുഖത്തിലാണ് അദ്ദേഹം ഇത് പുറത്ത് വിട്ടത്. ഒരു നിശ്ചയത്തിന്റെ തലേദിവസത്തെ കഥയാണ് തിങ്കളാഴ്ച നിശ്ചയം പറഞ്ഞതെങ്കിൽ, ഇതിന്റെ രണ്ടാം ഭാഗത്തിൽ ഒരു വിവാഹവുമായി ബന്ധപ്പെട്ട സംഭവങ്ങളായിരിക്കും അവതരിപ്പിക്കുകയെന്നും അദ്ദേഹം പറയുന്നു.

ആദ്യ ഭാഗത്തിന് ഗംഭീര പ്രതികരണം ലഭിച്ചപ്പോൾ തന്നെ രണ്ടാം ഭാഗത്തെ കുറിച്ച് താൻ ചിന്തിച്ചിരുന്നുവെന്നും, രണ്ടാം ഭാഗമൊരുക്കാനുള്ള ഒരുപാട് ആശയങ്ങൾ കൈവശമുണ്ടെന്നും അദ്ദേഹം കൂട്ടിച്ചേർത്തു. തിങ്കളാഴ്ച നിശ്ചയത്തിന് ശേഷം അദ്ദേഹം സംവിധാനം ചെയ്ത ചിത്രമാണ് 1744 വൈറ്റ് ആൾട്ടോ. ഷറഫുദ്ദീന്‍ നായകനാവുന്ന ചിത്രത്തില്‍ വിന്‍സി അലോഷ്യസാണ് നായികാ വേഷം ചെയ്യുന്നത്. ശ്രീരാജ് രവീന്ദ്രനൊപ്പം ചേർന്ന് സംവിധായകൻ തന്നെ രചിച്ച ഈ ചിത്രത്തിന്റെ തിരക്കഥയിൽ അര്‍ജുന്‍ ബി എന്ന നവാഗതനും സഹകരിച്ചിരിക്കുന്നു. രാജേഷ് മാധവന്‍, നവാസ് വള്ളിക്കുന്ന്, ആര്യ സലിം, ആനന്ദ് മന്‍മഥന്‍, സജിന്‍ ചെറുകയില്‍, ആര്‍ജെ നില്‍ജ, രഞ്ജി കാങ്കോല്‍ എന്നിവരുമഭിനയിക്കുന്ന ഈ ചിത്രത്തിന് ശേഷം, കുഞ്ചാക്കോ ബോബൻ നായകനായി എത്തുന്ന പദ്മിനിയാണ് സെന്ന ഹെഗ്‌ഡെ ഒരുക്കുക.