റെക്കോർഡ് കളക്ഷൻ നേടി ശിവകാർത്തികേയന്റെ സീമരാജ ബോക്സ് ഓഫീസ് കീഴടക്കുന്നു…!

നിർമ്മാതാവും രചയിതാവുമായ ആർ ഡി രാജയുടെ ഉടമസ്ഥതയിൽ ഉള്ള 24 AM സ്റ്റുഡിയോസ് നിർമ്മിച്ച പുതിയ ചിത്രമാണ് യുവ താരം ശിവകാർത്തികേയൻ നായകനായി എത്തിയ സീമരാജ. കഴിഞ്ഞ ആഴ്ച റിലീസ് ചെയ്ത ഈ ചിത്രം ഇപ്പോൾ വമ്പൻ ബോക്സ് ഓഫീസ് കളക്ഷൻ ആണ് നേടുന്നത്. ആദ്യ ദിന കളക്ഷനിൽ തമിഴ് നാട് ബോക്സ് ഓഫീസിലെ ഈ വർഷത്തെ ഏറ്റവും വലിയ ഓപ്പണിങ് സ്വന്തമാക്കിയ ഈ ചിത്രം സൂപ്പർസ്റ്റാർ രജനികാന്ത് ചിത്രം കാലായെ ആണ് പിന്നിലാക്കിയത്. ഇപ്പോഴിതാ നാല് ദിവസം കൊണ്ട് ഇരുപത്തിയഞ്ചു കോടി രൂപ കളക്ഷൻ നേടിക്കൊണ്ട് ബോക്സ് ഓഫീസിൽ പടയോട്ടം നടത്തുകയാണ്‌ ഈ ശിവകാർത്തികേയൻ ചിത്രം. റെമോ, വേലയ്ക്കാരൻ തുടങ്ങിയ ഹിറ്റ് ചിത്രങ്ങൾ ഒരുക്കിയ 24 AM സ്റ്റുഡിയോയുടെ ചിത്രങ്ങളിൽ ഏറ്റവും കൂടുതൽ നായകൻ ആയതു ശിവകാർത്തികേയൻ ആണ്.

വരുത്തപ്പെടാത്ത വാലിബ സംഘം, രജനി മുരുകൻ എന്നീ ശിവകാർത്തികേയൻ ചിത്രങ്ങൾ ഒരുക്കി സൂപ്പർ ഹിറ്റാക്കിയ പൊൻ റാം ആണ് സീമരാജയും രചന നിർവഹിച്ചു സംവിധാനം ചെയ്തിരിക്കുന്നത്. സാമന്ത നായിക ആയെത്തിയ ഈ ചിത്രത്തിൽ സിമ്രാൻ, ലാൽ, സൂരി എന്നിവരും പ്രധാന വേഷങ്ങൾ ചെയ്യുന്നുണ്ട്. ഒരു കമ്പ്ലീറ്റ് എന്റെർറ്റൈനെർ ആയാണ് സീമ രാജ ഒരുക്കിയിരിക്കുന്നത്. ശിവകാർത്തികേയൻ ആരാധകർക്ക് ആവേശമാകുന്നു ഈ ചിത്രം എല്ലാത്തരം പ്രേക്ഷകരെയും ആകർഷിക്കുന്നു എന്നാണ് തിയേറ്റർ റിപ്പോർട്ടുകൾ സൂചിപ്പിക്കുന്നത്. ശിവകാർത്തികേയൻ- സാമന്ത ജോഡികൾ ആദ്യമായി ഒരുമിച്ചു അഭിനയിച്ച ചിത്രം എന്ന പ്രത്യേകതയും സീമ രാജക്കു ഉണ്ട്. ഡി ഇമ്മൻ സംഗീതം നൽകിയിരിക്കുന്ന ഈ ചിത്രം ലോകമെമ്പാടു നിന്നും ഗംഭീര കളക്ഷൻ ആണ് നേടുന്നത്. ചെന്നൈ സിറ്റിയിൽ നിന്ന് മാത്രമായി മൂന്നു കോടിയിൽ ഏറെ ഈ ചിത്രം നേടിക്കഴിഞ്ഞു.