സ്റ്റാൻലിക്കും കൂട്ടുകാർക്കുമൊപ്പം അടിച്ചു പൊളിക്കാൻ ഒരു ശനിയാഴ്ച രാത്രി; നിവിൻ പോളി ചിത്രത്തിന്റെ പുതിയ പോസ്റ്ററും സൂപ്പർ ഹിറ്റ്

ഇന്നലെ രാവിലെയാണ് യുവ താരം നിവിൻ പോളിയെ നായകനാക്കി റോഷൻ ആൻഡ്രൂസ് ഒരുക്കിയ പുതിയ ചിത്രത്തിന്റെ ടൈറ്റിൽ, ഫസ്റ്റ് ലുക്ക് പോസ്റ്റർ എന്നിവ റിലീസ് ചെയ്തത്. സാറ്റർഡേ നൈറ്റ് എന്ന് പേരിട്ടിരിക്കുന്ന ഈ ചിത്രത്തിന്റെ ടാഗ് ലൈൻ കിറുക്കനും കൂട്ടുകാരുമെന്നാണ്. സ്റ്റാൻലി എന്ന കഥാപാത്രമായി നിവിൻ പോളിയെത്തുന്ന ഈ ചിത്രത്തിന്റെ ഫസ്റ്റ് ലുക്ക് പോസ്റ്ററിൽ നിവിനൊപ്പം അജു വർഗീസ്, സിജു വിൽസൺ, സൈജു കുറുപ്പ് എന്നിവരുമുണ്ടായിരുന്നു. ഒരു കോമഡി ത്രില്ലറായാണ് ഈ ചിത്രമൊരുക്കുന്നതെന്നും, വളരെ കളര്ഫുള്ളായ ഒരു എന്റർടൈനറായിരിക്കും ഈ ചിത്രമെന്നുമാണ് ഇതിന്റെ പോസ്റ്റർ സൂചിപ്പിക്കുന്നത്. ഇപ്പോഴിതാ, ഇതിന്റെ രണ്ടാമത്തെ പോസ്റ്റർ കൂടി പുറത്തു വന്നിരിക്കുകയാണ്. ആദ്യത്തെ പോസ്റ്റർ സമ്മാനിച്ച അതേ ഫീൽ തന്നെ സമ്മാനിക്കുന്ന ഈ രണ്ടാം പോസ്റ്ററിൽ ചിത്രത്തിലെ മറ്റു കഥാപാത്രങ്ങളെ കൂടി ഉൾപ്പെടുത്തിയിട്ടുണ്ട്.

ഈ ചിത്രത്തിലെ പ്രധാന സ്ത്രീ കഥാപാത്രങ്ങൾക്ക് ജീവൻ നൽകുന്ന ഗ്രേസ് ആന്റണി, മാളവിക ശ്രീനാഥ് , സാനിയ ഇയ്യപ്പൻ എന്നിവരെയാണ് നിവിൻ പോളി, അജു വർഗീസ്, സിജു വിൽസൺ, സൈജു കുറുപ്പ് എന്നിവർക്കൊപ്പം ഇതിൽ കാണാൻ സാധിക്കുക. എ ബി സി ഡി, അനുരാഗ കരിക്കിൻ വെള്ളം എന്നിവ രചിച്ച നവീൻ ഭാസ്കർ തിരക്കഥ രചിച്ച ഈ ചിത്രം വിനായക ഫിലിംസിന്റെ ബാനറിൽ അജിത് വിനായകയാണ് നിർമ്മിച്ചിരിക്കുന്നത്. സൂപ്പർ വിജയം നേടിയ കായംകുളം കൊച്ചുണ്ണി എന്ന ചിത്രത്തിന് ശേഷം നിവിൻ പോളിയും സംവിധായകൻ റോഷൻ ആൻഡ്രൂസും കൈകോർത്ത ഈ ചിത്രം പൂജ റിലീസായാണ് എത്തുന്നത്. അസ്‌ലം കെ പുരയിൽ ക്യാമറ ചലിപ്പിച്ച ഈ ചിത്രത്തിന് സംഗീതമൊരുക്കുന്നത് ജേക്സ് ബിജോയ്, എഡിറ്റ് ചെയ്യുന്നത് ടി ശിവാനന്ദേശ്വരൻ എന്നിവരാണ്.