പൃഥ്വിരാജ് നായകനായ പാൻ ഇന്ത്യൻ ചരിത്ര സിനിമ; വെളിപ്പെടുത്തി സന്തോഷ് ശിവൻ..!

പ്രശസ്ത ഛായാഗ്രാഹകനും സംവിധായകനുമായ സന്തോഷ് ശിവൻ സംവിധാനം ചെയ്ത ഏറ്റവും പുതിയ മലയാള ചിത്രമാണ് ജാക്ക് ആൻഡ് ജിൽ. ലേഡി സൂപ്പർ സ്റ്റാർ മഞ്ജു വാര്യർ നായികാ വേഷം ചെയ്യുന്ന ഈ ചിത്രം മെയ് ഇരുപതിന്‌ റിലീസ് ചെയ്യും. ഒരു വലിയ ഇടവേളയ്ക്കു ശേഷമാണ് സന്തോഷ് ശിവൻ വീണ്ടും മലയാളത്തിലെത്തുന്നത്. അനന്തഭദ്രം, ബിഫോർ ദി റെയിൻസ്, ഉറുമി എന്നിവയാണ് അദ്ദേഹം ഇതിനു മുൻപ് മലയാളത്തിൽ ചെയ്ത ചിത്രം. ഷാരൂഖ് ഖാൻ നായകനായ ഹിന്ദി ചിത്രം അശോകയും പൃഥ്വിരാജ് നായകനായ മലയാള ചിത്രം ഉറുമിയുമാണ് അദ്ദേഹം ഇതിനു മുൻപ് ചെയ്ത ചരിത്ര സിനിമകൾ. ഇപ്പോഴിതാ, താൻ വീണ്ടുമൊരു ചരിത്ര/ പീരീഡ് ചിത്രം പ്ലാൻ ചെയ്യുന്നുണ്ട് എന്നും, അതിൽ പൃഥ്വിരാജ് ആയിരിക്കാം നായകനെന്നും അദ്ദേഹം വെളിപ്പെടുത്തുന്നു.

ജാക്ക് ആൻഡ് ജിൽ പ്രമോഷന്റെ ഭാഗമായി ബിഹൈൻഡ് വുഡ്‌സ് ഐസിനു നൽകിയ അഭിമുഖത്തിലാണ് അദ്ദേഹം ഈ വെളിപ്പെടുത്തൽ നടത്തിയത്. ഇപ്പോൾ പാൻ ഇന്ത്യ ചിത്രങ്ങളാണ് എല്ലാവരും ഒരുക്കുന്നതെന്നും, പാൻ ഇന്ത്യ തലത്തിൽ സ്വീകരിക്കപ്പെടണമെങ്കിൽ കുറച്ചു അവിശ്വസനീയത കഥ പറച്ചിലിലും അവതരണത്തിലും കൊണ്ട് വരണമെന്നും അദ്ദേഹം പറയുന്നു. താൻ അത്തരമൊരു വലിയ ചിത്രത്തിന്റെ കഥ പൃഥ്വിരാജ് സുകുമാരനോട് പറഞ്ഞിട്ടുണ്ട് എന്നും, എല്ലാം സെറ്റായി വന്നാൽ അടുത്ത വർഷം തന്നെ ആ ചിത്രത്തിന്റെ ജോലികളാരംഭിക്കുമെന്നും സന്തോഷ് ശിവൻ പറയുന്നു. ഇപ്പോൾ മോഹൻലാൽ ആദ്യമായി സംവിധാനം ചെയ്യുന്ന ബറോസിന് ക്യാമറ ചലിപ്പിക്കുകയാണ് സന്തോഷ് ശിവൻ. ആദ്യമായാണ് അദ്ദേഹം ഒരു ത്രീഡി ചിത്രത്തിന് കാമറ ചലിപ്പിക്കുന്നത്.