വിമർശകരുടെ വായടപ്പിച്ച് സന്തോഷ് പണ്ഡിറ്റിന്റെ കിടിലൻ ലുക്ക് പ്രേക്ഷകശ്രദ്ധ നേടുന്നു

മമ്മൂട്ടിയെ നായകനാക്കി അജയ് വാസുദേവ് സംവിധാനം ചെയ്യുന്ന ചിത്രമാണ് ‘മാസ്റ്റർ പീസ്’. മമ്മൂട്ടിയോടൊപ്പം സന്തോഷ് പണ്ഡിറ്റും ചിത്രത്തിൽ ഒരു മുഴുനീള വേഷം കൈകാര്യം ചെയ്യുന്നുണ്ട്. മലയാള സിനിമയിലെ താരാധിപത്യത്തേയും മുന്‍നിര സിനിമകളുടെ ധൂര്‍ത്തിനേയും പരിഹസിച്ച് രംഗത്തെത്തിയ സന്തോഷ് പണ്ഡിറ്റിന് നാനാഭാഗങ്ങളിൽ നിന്നും നിരവധി വിമർശനങ്ങൾ ഏറ്റുവാങ്ങേണ്ടിവന്നിട്ടുണ്ട്. എന്നാൽ അതൊന്നും വകവെയ്ക്കാതെ ശക്തമായ നിലപാടുകളിലൂടെയും പ്രവർത്തികളിലൂടെയും അദ്ദേഹം കുറഞ്ഞ ബഡ്‌ജറ്റിൽ തന്റെ സിനിമകളെ കൃത്യമായി മാര്‍ക്കറ്റ് ചെയ്യുകയും പ്രേക്ഷകരിലെത്തിക്കുകയും ചെയ്തു. ഇതിലൂടെ ചുരുങ്ങിയ ചിലരുടെയെങ്കിലും മനസ്സിൽ ഇടം നേടാൻ പണ്ഡിറ്റിന് കഴിഞ്ഞു.

ഇതാദ്യമായാണ് താന്‍ സംവിധാനം ചെയ്യാത്ത ഒരു ചിത്രത്തില്‍ സന്തോഷ് പണ്ഡിറ്റ് അഭിനയിക്കുന്നത്. കൃഷ്ണനും രാധയും ടിന്റുമോൻ എന്ന കോടീശ്വരൻ എന്നീ ചിത്രങ്ങൾ സ്വന്തമായി സംവിധാനം ചെയ്ത് അഭിനയിച്ച് അദ്ദേഹം ശ്രദ്ധ നേടുകയുണ്ടായി. ഒടുവിൽ വിമർശകരുടെ വായടപ്പിച്ച് മമ്മൂട്ടിയോടൊപ്പം ഒരു മുഴുനീള വേഷം ചെയ്‌തതിന്റെ സന്തോഷത്തിലാണ് താരം. ചിത്രത്തിലെ സന്തോഷ് പണ്ഡിറ്റിന്റെ വേഷപ്പകർച്ച ഏറെ ശ്രദ്ധിക്കപ്പെട്ടിരുന്നു. സന്തോഷ് പണ്ഡിറ്റ് ആദ്യമായി അഭിനയിക്കുന്ന ഒരു മുഖ്യധാര ചിത്രം എന്നതിനാൽ ആരാധകരും ഏറെ പ്രതീക്ഷയിലാണ്.

കാംപസ് പശ്ചാത്തലത്തിലുള്ള കഥ പറയുന്ന ചിത്രത്തിൽ കൊളേജ് പ്രൊഫസറായാണ് മമ്മൂട്ടി എത്തുന്നത്. ഉണ്ണി മുകുന്ദൻ, ഗോകുൽസുരേഷ് ഗോപി, മുകേഷ്, മഖ്ബൂൽ സൽമാൻ, സിജു ജോൺ, പാഷാണം ഷാജി, ബിജു കുട്ടൻ, അർജുൻ, അജ്മൽ നിയാസ്, സുനിൽ സുഗദ, കൈലാഷ്, കലാഭവൻ ഷാജോൺ, ശിവജി ഗുരുവായൂർ, വരലക്ഷ്മി, പൂനം ബജ്‌വ തുടങ്ങിയ താരങ്ങളും ചിത്രത്തിൽ അണിനിരക്കുന്നു.